沉晚 , 同親親講咗一分鐘電話 , 直覺覺得佢心情唔係幾好 , 有時佢唔開心 , 都唔會比我知 , 不過我會 FEEL 到少少 , 始終都識一年 , 而且我真係花咗唔少心機去了解佢 。 我已經習慣咗 , 唔去問佢因咩唔開心 , 因為佢唔同我講 , 一定有佢原因 , 我只係打字比佢同佢講 , 知道佢有D嘢唔開心 , 但無論點我都唔會再掉低佢走咗去 , 叫佢安心去完成佢想做既事 , 佢覆返話 , 話佢會學下放鬆D 。 佢會覆返我會安心好多 。

不過之後知道佢又差唔多 3:00 先瞓 , 我就會好擔心 , 唔係擔心佢失眠 , 而係佢一瞓唔著 , 就多數唔係咁簡單既事 , 但都無辦法 , 佢想講時就會講 。

今朝 , 見佢咁早起身上 whatsapp , 就問下佢做咩咁早醒 ?? 我其實都係問候下佢 , 叫佢唔洗回我 , 因為知佢果個時候唔方便 , 不過有D意外係 , 佢下午打咗字比我 , 話佢心情好番好多 , 個傻妹知道我會擔心佢 , 佢又會成日想我唔好太擔心 , 有時唔知係我安慰佢 , 定佢安慰我 。 我就話 , 佢心情唔好可以搵我訴苦 , 想發脾氣可以向我發 , 發到心情好返晒先停都得 , 我比咗 permit 佢可以任意向我發脾氣 !!! 佢睇完後打咗 :「哈哈」 .......

好在 , 我D「傻嘢」仲可以氹到佢開心 , 親親就係仲有依D童心 , 我就係中意佢依D性格 , 唔知我係咪唯一一個會講依D傻嘢去氹佢開心既人 , 其他男仔又真係好似好少氹佢 

今晚親親仲未打比我 , 唔知一陣會唔會打呢 ??? 其實都唔一定要每日講一次電話既 , 而且佢可能瞓咗 , 等佢一覺瞓天光好D