經過沉日見面 , 唔知今日自己又做咩 , 覺得有D嘢 , 真係好想聽到「親親」親口講 , 於是又「鬼上身」, 打字問佢 , 其實佢有無打算同「男人」一齊生活 ...... 我希望佢會同我講 , 佢唔會同個男人有「將來」啦 , 不過如果佢話 , 我話如果嗻 , 佢講佢會同個男人一齊生活 , 只要個男人繼續「交租」比佢 ~ 的話 ...... 我諗我又會有另一個打算 , 其實到依一秒 , 我都仲有諗 , 不如出去識下其他人 , 試下會唔會搵到另一個女仔啦 , 我唔知係咪對同佢既關係唔夠信心 , 定係對自己無信心 , 我亦成日諗 , 如果明知同親親必定唔可能再發展的話 , 咁我仲為咩要留低 ?? 不如依家瀟灑D走啦 ......

但我之前明明同佢講過 , 無論點都會留低照顧佢 , 唔會掉低佢自己走咗去 , 如果依家又自己調頭走 , 又驚佢會好孤單 , 個男人成日要交人 , 都唔可以成日陪佢 , 佢雖然從來無講出口 , 不過知道 , 佢因為有我成日陪下佢 , 佢先可以無咁悶 , 所以如果我又掉低佢 , 就真係好無義氣 , 話晒自己都係真心中意佢 , 唔想做D會令佢唔開心既事 , 曹操話 : 寧我負天下人 ~ 但我真係情願 : 寧天下人負我 , 我不負天下人 ~ 唔係話自己好心 , 只係咁樣 , 只至心安理得D , 同少D內疚感 。

我向親親提出果個問題 , 其實又有少少後悔 , 如果佢一早就無打算同個男人有感情關係 , 我咁問佢 , 佢一定唔開心 , 覺得我成日驚佢走 , 會令佢無安全感 , 咁又點可以放心同我繼續相處丫 ??? 同朋友討論過 , 又係既 , 如果佢愛果個男人 , 又點會同我咁 CLOSE 丫 ?? 又點會成日比我陪佢丫 ??? 其實我今日都想通咗一件事 , 既然 , 我點都唔會捨得唔理親親 , 咁佢會唔會同個男人一齊 , 又有咩咁重要 ??? 就算有一日佢真係要走 , 咁咪陪到佢最後一秒囉 , 洗咩刻意要佢比個答案我丫 ??? 佢可能更期望 , 佢唔講 , 我都會明白佢 , 因為一直 , 我都可以好理解到佢心裡面諗緊咩 ......

今日 , 去到 11:59 分 , 佢都無答我問佢既事 , 我反而覺得咁仲好 , 我唔知佢點解唔答 , 什至一D都唔提 , 我以為佢會又再話 , 佢同個男人點 , 都唔會影響我同佢既關係 , 不過佢最後都無咁講 , 可能佢係特登唔答 , 女人有時可能就係咁 ......

佢晚上有打比我 , 因為我講咗會打比佢 , 講返一D資料比佢聽 , 但我又未打 , 所以佢就先搵我 , 咁睇 , 佢似乎又無因為我問咗佢個問題 , 而令佢唔想同我講嘢 , 同佢講完之後 , 佢 SMS 我 , 話佢瞓喇 , 仲叫我早D瞓 。 佢好少會咁同我講 , 依幾日 , 佢好似比以前 , 多咗D掛住我咁 , 特別係 , 沉日喺佢屋企走 , 走之前 , 佢過嚟攬住我一陣 , 好似男女朋友咁 , 之後佢又企定定 , 望住我行出大門口 , 仲笑住同我揮手88 , 好似D MV 女主角咁 , 唔捨得男朋友走 ....... 希望唔係我諗多咗啦 , 咁佢真係睇得出 , 我喰到佢「燶」既 , 可能仲縱壞晒佢 。 但我又有種不詳預感 , 驚佢好快會同我講 , 大家以後唔可以再來往 ....... 驚佢明知要走 , 所以趁依排對我好D ...... 唉 , 希望只係我胡思亂想啦 .............