 政情：社民連出Game惡搞唐唐
各大政黨喺年宵攤位各出奇謀，推出唔同紀念品，無非係想籌多啲經費，好似以貧窮出名嘅社民連，今年出售嘅貨品內容係痛擊庸官同特首參選人唐英年，而且仲設計埋電腦遊戲，夠晒心思。
社民連電腦遊戲《長毛憤怒了》同《酒後施政害己害人》，寸爆一眾高官及唐唐。
兩款電腦遊戲包括《長毛憤怒了》同《酒後施政害己害人》，第一款同手機遊戲《憤怒鳥》相似，玩家操控遊戲中嘅梁國雄（長毛），用雞蛋擲向煲呔曾、政務司司長林瑞麟、財政司司長鬍鬚曾、運輸及房屋局局長鄭汝樺，以打倒佢哋為目標。
《酒後施政害己害人》
至於第二款遊戲仲過癮，玩家要操控唐唐，避開長毛嘅監視去偷紅酒飲，如果中途畀長毛睇到，就會畀佢用雞蛋擲，如果成功飲滿「醉酒指數」，就會有句「你是個很會享受的高官」字樣「稱讚」。另外，年宵亦有檔主借用唐唐個樣推銷紅酒咕o臣，可惜銷情麻麻，證明唐唐要被人惡搞先夠吸引。 |
