突然想打blog打返頻啲，係暑假將盡症o既一個癥狀。

xxxxx

睇完Bokuragaita第七集(anime)，
可能呢集導演o既風格較唔同，
矢野回憶初中時座位喺山本(妹)隔離果幕
表達得好warm，有好感覺呀。
常言道！回憶總是美~(相馬)
人腦為左keep住人o既生存希望，
會自然保留美好o既事…

我記憶o既起點，應該喺幼稚園最後一年，
唔知點解就係記得幾個同學，
連名都記得，夏景基，明明冇聯絡幾廿十年…
帶壞我，得果五六歲，已經喺度「你鍾意佢牙佢鍾意你」嘞，
果時仲好似暗戀個missi添！XDDD
E-kids嘛，冇計啦，資訊污染太嚴重=口='
呢段時間亦都係我「小時了了」開始顯露，
考第一，攞左一千蚊比阿媽洗，
弊在又真係「大未必佳」呢…

小學一年級就開始喺屯門一間佛教小學讀，
亦從此結下佛緣(？)
講開講我近期先知屯門原來當時喺香港稍為被視為窮、治安差，
被睇低o既一區，同天水圍差唔多。
小時候社會科講，只係話咩發展咩新市鎮咁，暪騙細路呀，
特別係蝴蝶邨好似發生過事，我住o既湖景邨隔離…
而屯門咩最出名呢？根據我搬去粉嶺之後o既經驗︰
「咦？你邊度黎架？」
「屯門。」
「吓？？色魔？！」
「……」
冇錯屯門就色魔最出名，歡迎外國朋友都買返去做手信。
此quote係除「達仔！你姓乜架？姓劉？吓？劉以達？！」之外我o既飛弗。
講遠左，小學我記得o既同學，首先係個陳蔚昇，到搬左都仲有聯絡過…
細個我文盲，衛星？慧星？蔚昇！記佢名記左好耐所以依家仲記得佢名…
印象係大大隻，又搞笑咁，佢阿媽都好似好好笑，
有次佢手拎住水壼飲緊水，我唔知發乜神經揮手同佢打招呼一嘢拍落佢個水樽度
……結果佢爆哂缸流左好多牙血。= =|||
而家諗起，真係要跪喺度講對唔住至得，我細個癲癲得得。
仲有暗戀過班長，叫鄭詠雯，記得係因為同鄭秀文爭一個字…
well，細個o既暗戀嘛，心理未全，真係唔知算乜，有好感都稱唔上，
印象都模糊lu，好似幾乖而又成績好果類，
但我又記得佢頂撞過老師咁喎，
另外有次喺操場小息，我喺度睇佢同其他一班同學玩，
一陣之後佢問我一唔一齊玩，我心小鹿亂撞左一下(XD)，跟住懶要面咁拒絕左，
正一自閉仔！不過果一刻o既開心感覺，竟然到依家仲依稀記得。
咁細個就識唔想exclude人，性格超級好，係個非人形面版o既朝倉涼子。
仲有唔知點解同一個叫咩惠o既拖過手仔！XDD
仲要比人睇到，起哄，哈哈哈，
讀過男女校o既一定同意，全班起哄o既原因絕大部分都係因為所謂「緋聞」。
仲有仲有個林咩俊，成日同我研究數學，同足球…Orz
我諗我果啲ok但又唔算突出o既math sense就係呢個時候萌芽…XDD

五年級搬左去粉嶺。
又係讀佛教學校，你話係咪有佛緣吖。
細個仔真係適應得好快，
而又可能因為啲僻壤小學，同學夠純樸…XD
第一個識o既叫張文忠，我坐佢隔離，
記得佢個名係因為好似有個區議員個名差唔多，
好老積，成日講道理咁，
佢阿爸幾和氣，
但最印象深刻o既係！(請先放下手中食物)
「我細個食過屎呀！
係呀！喺鄉下！啲親戚呃我！話係啫喱！
走過去痰罐度攞黎食囉！
咩味？就好似…」
好似乜，我選擇性失憶唔記得左。
呢個絕對係飛弗quote of all time三甲之一！= ='
係我人生第一次亦應該係最後一次有人驚死我唔信咁向我力證佢真係食過屎，
不過我又真係幾存疑，
「果啲係啫喱」呢招同葵花寶典o既「必先自宮」異曲同工喎，都係靠害架啫，
點都唔信會出自一個親戚之口假。
ahem，再對食緊餅乾/薯片o既致歉，特別係食緊choc cookies果啲。
另外應該要著墨o既叫黃樂維，同我一樣喺五年級開學第一日冇位坐——都係轉學生，
果時覺得佢係靚仔一個！XDDD五年級已經識gel頭嘞，仲要冇比風紀捉過。
我懷疑全班有好多佢o既暗戀者！因為見過女同學同佢講嘢時表情有啲雀躍XD
我有時會叫佢「黃維」，因為當時對於詩人逸事有啲沉迷，
佢其實亦非常之好笑，係班中好多笑聲o既來源——點解靚仔通常搞笑？上天double unfair。
關於佢有一個point，話說果時「黃夏蕙」係城中話題，雖然係乜事我而家唔記得哂，
名字音近o既黃樂維就被取花名，夏蕙姨…Orz
同而家台灣o既「上流美」社會效應令人側目一樣，
一有同學起哄「夏蕙姨」點點點通常全班笑翻…
有次起哄時被教數o既中年missi馬生(鄭生、盧生…喺正覺時男女老師都咁叫，所謂風氣)overheard到，
missi以為學生話自己黃夏蕙，喺教師室講起，一阿sir尤其笑得大聲…
經過我拖泥帶水o既敘述真係難笑，不過當時真係笑死。果個missi應該而家都仲記得黃樂維…
我呢呢段時期要同佢之外，仲有一個叫龍鎮宇最熟(可能只係我單方面地覺得)…
唔識佢時對佢印象，係個正正經經，老師黎嘞就要大嗌「起立！敬禮」o既班長…
點知卸下班長身分o既第二人格同「正經」大纜都扯唔埋。
印象最深係有次暑假group project去佢屋企，竟然變左成group人喺度打機，粗口橫飛…
玩KOF時KO不知火舞一定用大招打爆佢件衫，跟住指住佢大嗌露點露點…
有人去廁所時成隻馬騮咁擒上牆偷睇，
因為佢屋企都係公屋呀，廁所間出黎架嘖，天花板會有條縫隙。
不過扮架啫，唔係真係想睇，bum bum聲係人都知佢爬左上去啦。
總之喺果個年紀，一定會覺得佢係個有趣o既人。
諗起黎，我自己都比人話過，「唔熟真係唔知你幾玩得喎」，好似黃樂維講o既，
原黎自己「悶騷」，或者講外冷內熱o既性格喺呢個時間之前已經有…

而年中又暗戀班長…咦！原來我有班長complex！講真，我都唔知點解。
五年級班長叫葉潔琳，音近，花名「易潔鑊」。
靚！膚色同五官輪廓都深，唔知係咪有混到血。
性格好刁鑽古怪…具體我有啲模糊唔記得，
總之係個喺老師眼中o既好班長，喺同學眼中o既大姐頭咁。
同佢比較有緣，話說六年級突然以成績分級…
有次掉位掉左去佢左上方，
竟然慢慢熟起黎(五年級可說三唔識七)，
契機、話題都唔記得哂lu，
倒係記得我後面，即係葉潔琳左邊隔離o既羅瑜，
記得係因為有次比個阿sir全班罰抄名唔知幾次，
佢英文Lo Yu Lo Yu咁寫分鐘唔使寫鬼完！XD
「攞魚」係六年級班長，又~係熟絡先覺得佢玩得o既…
其實書呆子形象根本係荒謬o既stereotype，
有難以想像咁多人見人有書呆子外表就睇唔起人，
以貌取人永遠都係人類會犯o既錯呀，
而就算真係同所謂o既書呆子相處過，
驚訝其內外o既不同後，又會冠以雙面、假惺之名…
但係又係咪內外如一o既人先可以交往？
有邊個又可以話自己對周圍o既人100%腦中o既事情同想法知道同明白哂…
而相反直率又係咪可以成為冇禮貌o既藉口呢？
每個人都一定一定試過顧慮到人哋而有想法冇講出口，
每個人都一定會識得藏拙，每個人都有秘密，等等…
只要唔係惡意唔係欺騙，喺人類社會都係正常。
人類倚靠語言溝通，語言一直係tool，亦係barrier，哪。
離題離譜嘞，隨筆得可以。
話說後來再一次掉位，暗戀對象呢次喺正隔離，
可能係我唔小心發動左涼宮春日o既能力添。
咁果段期間呢，都冇乜，應該日日都快樂上學去掛，雖然係快樂時光，但真係唔多記得嘞。
相處落，某日佢同我講︰「我以前都唔知，原來你個人咁可愛架！」意思大概咁。
排除我腦故障之類可能性，我發誓佢真係咁講過。
係我依家稍為不悅o既以貌取人論調，
但我當時十幾歲o既死o靚仔，而佢又用真係語帶可愛o既語氣講…
喺楊丞琳可愛怪…咳，教主o既入侵前，對呢挺可愛o既語氣「還是挺受落的」。
我諗我果時反應好似係心跳加速+有啲手足無惜掛，想回句話都回唔出。
呃，其實應該點回呢，「你都唔差吖」？有啲廢…
「我都係而家先知，你個人都幾好呀」？嘔…
唔知！嘩，即係我過左十幾年，根本原地踏步，冇進步過。
well that's about it，不過回想得出力啲，就有個叫張鴻雁o既出現。
話說有次唔知咩解我睇到佢唔知手冊定乜notebk之類寫住「我愛張鴻雁」…Orz
其實果時隱隱覺得佢有心比人睇到呢行字，- -'
後來知道張係葉潔琳prefect team入面o既學長之類…
點解六年級都會有學長我都唔知…可能記錯係五年級發生…但明明我坐佢隔離假應該係六呃，
又可能記錯其實唔係學長而係同年…又可能記錯其實五年級坐佢隔離…又可能記錯羅瑜…gosh，亂哂。
亂入一個聲名先，年代久遠，呢篇嘢所有邏輯、次序、因果都有機完全唔啱架。
總而言之啦！又有一日recess時見葉潔琳跑入班房，伏喺自己位喊喎！
真係not quite everyday你個暗戀對象會伏喺自己隔離喊，我諗我果時又係手足無措…Orz
失敗，紙巾、慰問一樣都冇，跟住好似同佢熟o既走過黎紙巾慰問，
再問起先知原委(係咪我問架呢…="=？)，係因為比佢學長鬧(鬧女人？- -')，
跟住佢好似仲大嗌「張鴻雁我憎死你呀」之類，肯定tvb睇太多。
最後點呢，只能靠想像，回憶冇replay，唔記得就係唔記得架嘞。
完，冇乜後續，關於佢都完嘞，不外乎朋友收場、升中失聯。
不過記得中學有次搭巴士撞到佢，佢讀陳融，失聯耐左，好快唔熟，撞到都冇幾句。
講開又講，上水<->粉嶺我搭左四年o既巴士係273A，而家Chapel Hill hwy exit又係273A(無聊！)
講開又講x2，我真係失聯高手，keep到contact o既舊同學少之又少，就算搵返舊同學都唔知有乜話題，唉。
呀，小學同學仲有個鍾子傑，一齊入左鄧顯，不過唔同班，照樣漸漸失聯…Orz
前排add左佢msn，見佢信左教，傾左幾句，後來果種無力o既距離感又黎。
仲有對「芝欣不報」twins羅妙芝、羅妙欣，好似芝係家姐(？)…
孖仔孖女真係稀罕而又吸引人目光o既存在…
記得兩個都好nice，但上鄧顯後被拆散去兩班，幾殘忍。
初中我同妙欣同班，果時同佢好似都有兩句咁，
後來分文理科時芝欣又同一班，a level時又比人拆散= =？
近幾年聽講有「欣勤戀」，而家應該仲順利掛~

講返班長complex，其實六年級時葉潔琳都唔係班長lu，
所以受呢個complex影響(？)慢慢就好似轉移左暗戀目標去現任班長度嘞。
嘩！如果亂暗戀人犯法，我小學都未畢業就比人的左去打靶lu。
嗯，暗戀就係人腦一大function呀，天經地義的，唔暗會蠢架。
六年級班長叫葉芷敏，可能到最後都未熟過o既關係，印象係傳說中o既乖乖優等生，
唔係有口話人冇口話自己，我相信同佢熟o既一定會知道佢有趣o既地方o既。
造成「暗戀」呢個比P/NP問題更難解o既現象原因實在不可考嘞，
講講下笑，唔會真係班長complex吖嘛…？唔興架喎，一啲都唔萌=口='
可能係因為日日搭同一班巴士返學放學，又一齊做班長咁啦。
講開做班長，六年級o既做班長經驗係災難性o既，相信亦係劉盛達廢柴ization o既initial phase。
不過葉芷敏真係絕非池中物，就算入左鄧顯時都keep住top ten，正覺之光呀，
諗起feel狀元xanga話為當日鄧顯寄得果十五(？)份入學申請表之類去佢學校…
我間正覺好似得十個位咋…Orz
不過，事實證明我哋呢啲鄉下小學真係臥虎藏龍呀。
對葉芷敏o既又返番去正宗暗戀之道︰遠遠咁望。
最大o既印象，可能係交換畢業紀念冊(唔知依家仲興唔興呢)時佢貼左好多貼紙比我咁，
當下受寵若驚，即刻貼呀貼…搶哂龍鎮宇啲貼紙貼返比人哋…
今日諗返，可能適得其反…因為貼啲「凸膠」貼紙整到人哋本紀念冊拱起哂(寒)。
冇lu就係咁，上左鄧顯分左班o既同時疏遠結束。-口-'
簡直係比葉落湖面更輕o既漣漪。

唔，若果要以一棵千年巨杉內o既水份比喻人生，
我哋自己為人生所下o既每個決定都會形成一個分枝﹔
一滴水，由樹根處被吸上黎途經無數樹枝交叉，
或不可抗力，或因緣際會，水滴喺路上不斷作出抉擇取捨，
到最終結露、成霜，甚或被植物本身消耗，
每一滴水，都有各自不同o既命運。
我諗入鄧顯呢個決定一定係主幹o既巨大分枝，
喺鄧顯o既短短四年可能好緊要，但真係有啲不屑回顧。
過分o既競爭風氣，被過份競爭風氣推動o既自己，
姑勿論對錯，始終係塑造出自己性格o既一個重要時期，
雖然，「如果可以改變過去」o既心情一直都在。
如果讀書懶啲，如果運動多啲，如果課外活躍啲，如果社交積極啲…
嘖，如果早幾年知要移民，可能呢四年會開心得多，起碼冇咁多壓力。

差唔多lu，應該有腦入面某% o既記憶都打哂出黎，容量真係細。
之所以打咁長，係等路人「望而生畏」，少啲人知我曾經幾幼稚。
我記得o既人，唔知有幾個記得我…我唔記得o既人，又會唔會有記得我架呢。
之所以響咁多人全朵，話唔定有人無聊search自己個名，最後會同我「相認」呢，
又或者見我亂up嘢唔妥我o既，可以搵返我隨便無尺度鬧臭我打我小人落我蠱，
再唔係…請炸我個blog出氣啦，不過記得叫左我backup先喎。