屯門公路靈異照

二十歲樓上o既可能對呢張相有印象？
難得整到個blog版面陰陰森森，
梗係要講下靈異嘢！

張相攝於九三年，
係當時警察影o既屯門公路快車相，
發現到有異之後上左頭版，都幾轟動，
依稀記得當時EYT做過反證，
幾條友用噴漆之類做到相入面o既效果咁。

google返黎o既疑似靈異照

細個天不怕地不怕，
從來唔信鬼神之說，
鬼片當笑片睇…
記得幼稚園時期，
每日放學跟媽去紙箱廠，
等到佢夜晚放工先走得，
工廠由office去restroom條路，
長，雜物多，夜晚熄哂燈時黑到伸手不見五指，
我哥好驚呢條路，成日匿喺我後面先肯去，
唔知係咪初生之犢，
完全冇驚o既感覺，
依家諗返起都覺得神奇。

印象好深係之後篇首張鬼相上頭版，
果日好似飲緊茶，我拎左黎睇，
張相本身已經可怕，
疑似靈體面目清晰可見，
又冇人企出黎話係移花接木。
當時我七歲，
張相真係blown my mind，
可能第一次見識到咁o既真實度，
睇完之後揮之不去，
開始怕黑怕鬼，
造成頗大陰影…

另一種靈異照

到左依家咁大個人，
漸漸又回復返細個時咁鐵齒，
即係又唔會否定哂，
聽人提撞鬼就建議應該同靈體溝通下，
畢竟人死後會點一直係每個活人o既疑問。
可能好cliche︰用單一角度去睇世界，
好似以管窺天，睇到o既唔係全面。
現代最多信眾o既應該唔係耶教而係科學，
太多人識講凡事要科學根據，
咁用科學黎睇呢個世界又係咪必然正確？
墨守於自己認知o既科學入面，
只會框住左自己。
習慣同經驗有時會成為限制，
一聽到靈異就反彈，本能性咁否決怪力亂神，
豈不是反而失去左科學開放、求證精神？

xxxxx

肥肥病逝，
難得整到個blog咁，
當為佢設喪又點話。