上星期我地同二佬已經約定今日一早去釣魚

食埋早餐去到目的地都係12點幾

比起我地估計時間都唔係遲好多

而男朋友都係請左半日假同我地會合

釣左一個中午,我已經釣夠一窩泥鯭粥

我諗應該重有剩少少可以加多碟餸呱

男朋友就同上次一樣對毒魚情有獨鍾

釣左我都唔知有幾多條上黎

不過最後比佢釣到只蟹做安慰獎

二佬就釣到兩條不知名魚,其實係我唔知咩魚~哈

至於阿恩呆足一個中午,到入黑差唔多走時

先至開始發功,釣左幾條魚,亦都因為呢個原因(我估)

二佬由9點開始話預備執野,到最後差唔多成11點先撤退!!

諗住兩只嘩鬼要返學,所以大家都打算早去早回

點知到最後係就係早去,但都係遲回

唔知戈兩只野返學有冇'釣魚"呢