睇返上次寫space都已經係5月20日了，space上的日誌都快成為月誌了，6月點能夠空白一片架，所以今日我忍唔住啦，所以隨便用幾分鐘時間寫返幾千字。

影相篇......送舊篇
5 月20日到30日都仲喺華大，21日果時係我地班影畢業照的日子，一早就要走去攞袍，跟住都係捉左幾個同學仔影下相咁。到下午正式影前又係自在影相時間， 到四點半左右真係埋位啦，同學仔們都企好曬位，但那些老師就遲遲都未嚟，好似大爺咁要我地等完又等，好難得先湊夠人數，連没教我地專業的衣長軍都嚟埋，而 有些嚟到居然著短褲涼鞋囧，而我的論文指導老師就聚餐影相都冇嚟囧囧。話說影畢業相都幾好玩，大陸人影相都習慣叫茄子"讀子音時會e起排牙笑"，而我們班 就特別不同，我們一起叫的是"五七"，五七是我們舊班長的名字，想起都覺得好笑，永遠記得那時大家影相時一起笑著叫"五七"。之後就仲有影拋帽相，為左捕 捉個刻我們還拋了三次呢，有一頂還丟到了在橫樑上，要用到大碌杉整返落嚟。影相都可以好開心，都可以令你印象深刻。
28日就到左濠江送舊ge日 子，前三年送舊都冇乜邊次去，而今次到一班學弟妹送我地呢幾舊啦!果晚仲有著數tim，每個舊野都有個有自己名ge印章送返比你，我果張有我個名ge貼紙 仲比德明貼左喺頭頂個橫樑度tim，我都冇諗住攞返啦，加上我唔夠高啦，希望果間店之後因為我個名ge貼紙而生意興隆就好啦，當然生意衰落都唔可以怪我 啦。最後又係跟傳統嚟一張大合照，但今年呢張淨係影大四生，記得以前全部所有人唔幾大幾都一齊影，好"搭馬"的。今次呢張冇乜氣勢。
跟住之後幾日就大概做過甚麽都唔係太記得，29日，臨走前一日，同璽揚喜去食左餐水煮活魚，第二日晚上就搭車返香港。

婚宴篇......雷暴警告篇
5 月30日到6月12日，話說e+出入境香港好麻煩，又要填返健康申報表了，填表係一分鐘搞掂的事，最煩的還是當你忘記帶筆，要等人用完後才可以有筆填表， 真係等到你呢......今次過境後我選擇的回家路線我都覺得我好傻好天真，心諗天氣會好熱，果日都真係的確幾熱。我就想把由火車站行去小巴站等車果段流 汗流到傻仔咁ge路程省回來，打算全程搭港鐵，貪佢室內有冷氣。由羅湖到九龍塘轉觀塘線到太子轉荃灣線到美孚轉西鐵線到屯門。轉左我差唔多兩個鐘先到屯 門，我搭上水小巴一個鐘唔洗就返到啦囧!最慘係其實由屯門站行返屋企果段路仲長過由上水火車站行去小巴站果段路，所以最後我都係流汗流到傻仔咁，個死人行 李箱又重喎，成日d位迫住我要用手拎。6月1日大家都忙住準備結婚ge事，好多人嚟左我地屋企，其中有個"大琴婆"平時冇乜見ge都嚟左。『小插曲，話說 6月1日晚食飯見過大琴婆一兩眼，6月2日即結婚日，老豆叫我去m記接大琴婆，我去到m記出面唔見大琴婆，我咪入去睇下囉，見到有個啊婆喺度食緊野，講 真，我真係認唔出佢係咪大琴婆，我又唔記得帶電話打唔到返去，我喺門口度猶豫左ok一段時間，先至入去問個啊婆係咪我大琴婆，真係...又驚就算佢真係大 琴婆，但平時咁少見，佢唔認得我點算好?點知原來佢真係唔係大琴婆，跟住之後我行到商場大門口先搵到大琴婆，呢個時候我哥都喺度，可能接二叔定咩我唔知， 之後佢帶二叔，我帶大琴婆。希望冇嚇親被我誤認係大琴婆ge個個婆婆啦。』就快到戲肉，越嚟越多人嚟，多到你想搵個位企下都冇，所以部分時間都喺哥間房 度，係出去幫過幾野手。我真係從來都冇諗到呢間屋可以容納咁多人囧。迎完新娘我地其他人就食飯再返下屋企抖下，跟住就三點未夠就出發去酒樓，我就係咁由四 點左右喺酒樓待待到接近十二點囧，其中我覺得值得一提的就係我們的家族，是怎麽回事，居然會大到咁?!唔知坐左幾多圍，淨係同我地果邊親戚影相都用左超長 時間...但都係影唔曬囧。開席前未有位坐，仲企到我抽根咁濟。跟住最後同三姑丈一台~開席了。睇完幻燈片，一對新人致詞，到姐講時我真係感動到喊左出 嚟，没有多大動作，默默的喊流出眼淚。之後幾日我諗返起今年我已經喊過好幾次了，原因有喜有悲。食野過程三姑丈未飲先醉還是飲少少醉左我唔知，成晚喺度煩 住我地三兄弟妹，我求其敷衍佢幾句，表現好冷淡，唔想令自己怒氣，同唔想同哥一齊附和佢。去敬酒，不是紅酒就是白蘭地，真的好飲嗎?我入到喉嚨ge感覺 係"哪"喉的，係啤酒的話都可以飲三，四支，但呢d就真係...最後送客返屋企，好漫長的一天哦。
跟住之後就係去下飲茶，去下醫院咁。計劃好11 日返華大，走前兩日就走去買車票，點知果日咁岩就遇岩雷暴警告，仲鬼咁大雨，我渣住把傘都濕曬褲腳。今次去羅湖全程搭港鐵又成為我的選擇，不拍風吹雨打， 只係又要嘥兩個鐘，好在今次冇行李好輕鬆。落鐵後好在冇雨了，真係要喺雷暴警告中去買一張車票，我都覺得我識得擇日子去買票囧。我一直都話我勁的，事關我 買車票12日會到學校，而搞離校手續果度就12日早上剛好截止，剛好趕得上，時間岩岩好，唔想讚自己都唔得。但點知我臨走個日揚兄msn講要我個一卡通號 可以搞掂囧。但都冇所謂啦，仲安心d tim啦咁。12日返到華大打比文明傾埋d野lu。
又話說我搭車返華大個日過境，我今次記得帶筆啦，我就好有型咁攞張健康申報表，寫幾寫，頂，支筆冇色喎，激鬼死我。跟住又要等人用完筆我先填得......

華大最後的日子篇......夢想萌生篇
6 月12日至今，返嚟後就搞下其他手續啊，得閒打下波啊，寫下野啊，溫下習啊，玩下野啊。跟住唔記得邊日lu，德安call左班人去影相，話說呢，我冇訂造 到學士袍，原因係要150或190，對我嚟講都太貴了。但果日我都去左，而我没有學士袍，所以...只好借左德明的嚟著，雖然唔同學院，但我只好委屈咁著 住先啦，我雙學士ge帶都帶過耶!影左幾個景之後，原本想借百強的，但佢竟可惡到要著去同其他人影，衰人!跟住書勝影夠除左袍，我就即刻又攞左佢件袍嚟 著，又影過。話說德安果日影到頂帽唔見左，跟住之後就出去買過頂，因為佢...第二日又要再去影，影到上曬隱。跟住又有一個苦惱地方，就係影埋影埋d相唔 知喺邊度攞返好，聚餐，畢業相個時都係好多相都未攞到，有d我係特別想攞返架囉，但唔知邊部機，問邊個攞好，早知買部相機唔洗咁苦惱啦。
之後呢， 就要離開學校啦，接著總要搵份野寄託下，出嚟做乜工其實我冇所謂，反而我比較想做的是另一樣野。話說大概喺答辯前ge一段時間突然對寫作有了興趣，可能寫 得多日誌，又篇篇都鬼死咁長，寫到興趣來了，同以前上某課選修課時我都有試過以玩票形式寫過幾千字的，加上都有幾個自覺唔錯的主題想到了。所以有種想試著 從筆為生的衝動，我唔知係咪真係只係一時衝動，總之就真係好想試下做。跟住返香港搵過下d資料，發現要入到行真係唔易，要識人，要根底深，而當中唯一令我 有點安慰的還是說不一定要有十分好文筆。要全職寫作對只係剛有想法還未實行的我來說根本不可能，所以都係諗住先做任何工作都冇問題，跟住一邊工作一邊從業 餘方面發展創作、投稿，最好有比賽可以參加，慢慢鍛鍊技巧。希望有一日可以靠寫野嚟搵飯食，嚟個可以算係我暫時ge夢想。所以我返到華大後就開始創作，正 式修改我之前選修課寫的故事。但做起嚟先發覺唔係咁易，進度很慢。但想真一點，唔做過我又點會真正體會到想同做係真係可以差十萬九千尺咁遠的。點都好，先 努力再說。其他時間都係上下網，打下機，打下雀(贏下錢haha)，溫下英文。

最後就係要執野了，跟住就係等廿五號的畢業禮，廿八號就走了。今個月就係咁啦，之後...香港啦!...或者澳門都會行下。總之就快要再見華大，再見同學仔啦。