好耐好耐都無食過啦，因為實在係太大工程，不過今次整左之後，一定會整多d，原來我屋企個煤氣爐都可以好快手就烘乾晒d大荳芽架!

材料

大荳芽 1斤

蒜頭 2-3瓣

免治豬肉 $10

做法

1) 芽菜摘去尾部，刴成粒備用。

2) 豬肉用豉油、豆粉、糖、紹酒及麻油略醃。

3) 蒜頭刴成茸備用。

4) 熱鑊(唔好落油)，將大荳芽菜落入白鑊，用慢火慢慢烘乾。

5) 用少量油爆蒜頭，然後加入豬肉，炒到八/九成熟，然後加入已烘乾既芽菜鬆，最後加入少少鹽同胡椒粉，兜勻之後就再係鑊邊加入少量既酒，炒勻上碟即可。
 

溫馨提示

1) 芽菜係一定要慢慢用白鑊烘乾，唔夠乾身就會有菜青味。

2) 成個餸既比例係菜多肉少架，所以豬肉不能夠多過芽菜。

一斤芽菜都係$6，成個菜用既錢真係有數得計，不過你用既時間就一定多啦! 我都用左差唔多一個鐘先煮好呢個餸，不過而家出去酒樓都食唔到架啦，係屋企煮下啦，個個都唔煮過多十年就真係失傳架啦。