明明自己很討厭遲到。繼F.3尾2果日因東隧壞車，當日東隧超過擠塞，花左大約1個鐘先完成車程，導致遲到3分鐘；今日我又因為交通意外而遲到喇……
今朝同平日一樣，依舊都係 06:49 出門口，乘搭 06:54 到既小巴（平日大約 07:14 就到學校）。小巴載滿客，正準備上將軍澳隧道，就見到前面有長長既車龍。小巴停低左，果陣係 07:05 。等左好耐，車龍都冇郁過，我個心開始跳得好快。小巴冷氣壞左，較唔到風口，冷氣直吹住我既心，使我個心越跳越快。
07:15 ，想到自己平日就係呢個時候到左學校，但係今日既我就仲喺架小巴果度。我唔想浪費時間，適蓬今日有英文默書，於是攞野出嚟溫習。
大約 07:20 ，小巴終於開始行喇！其實我一直都唔相信自己又會遲到，不過行左唔知幾多秒，又停低。呢個時候，我有少少感動。車上既乘客紛紛打電話，或者接到電話……「唔該幫我買早餐呀……熱奶茶加份多士……係呀，將軍澳隧道塞車呀，我而家仲喺隧道口……」、「喂？阿媽呀，你一陣搭地鐵啦，將軍澳隧道塞車呀……」、「我一陣可能會遲少少先到，你幫我同老闆講呀，唔該……」唔知點解，以上既通話，彷似係人生最後一個通話，好似係一個個遺言，叫家人、朋友唔好擔心，請佢地幫自己做野。我？因為學校有一條冇人道既校規，加上冷風吹到我，我真係感到無限寂寞……
大約 07:35 ，小巴終於入到隧道口喇！隧道口前有電子牌顯示「觀塘出口有交通意外，請小巴駕駛！」於是，又有唔少乘客又拎起手機，同家人、朋友報平安。小巴進入隧道，只係見到眼前漆黑一片，我放低簿仔，停止溫習。小巴行左冇幾秒，又一次停低，讓我細心觀察隧道既結構。平日唔駛一分鐘就飛越過既隧道，今日俾我停低慢慢欣賞，實在難得！小巴又行又停，唔知過左幾耐，遠處見到眼前有光芒，像是生命既唯一希望，小巴正向著前面既光芒爬去！
07:45 ，小巴終於出到隧道口了。外面廣播︰「由於啟田道發生嚴重交通意外，請各位忍讓，多謝合作。」小巴又停落嚟，我亦冇再溫書，一直盯住車頭時間器。時間不斷咁過，小巴卻沒有行過。
直至 07:55 ，學校鐘聲大概已經響起。小巴仍然喺隧道口附近慢行。結果大約 08:00 ，小巴終於脫離車龍，直奔向東區海底隧道，往港島方向出發。大約 08:09 ，小巴終於到西灣河，開門，落車。長達75分鐘既車程，就此完畢。
| 
