上次講完情,今次講吓愛.

人哋成日都話愛情愛情.

應該話中國人因為儒家思想,道德倫理嘅觀念好重,著重君臣,夫婦,父子之間嘅情,男嘅要三綱五常,女嘅要三從四德.喺呢種觀念下,中國人唔提倡愛,甚至可以唔知咩叫愛;但因為基於道德倫常,佢哋有責任要養育子女,照顧妻子,對上級尊重,必恭必敬,所以佢哋夫妻,父子之間有親情,朋友之間有友情,但係因為以前係盲婚啞嫁,婚姻之事就要父母之命媒妁之言,根本你唔使揀亦都唔到你揀,所以從來男女之間總是欠缺愛情,是有愛情的,但總是很少很少說出來.

而外國人真係好自由,沒有中國人嘅傳統沉重包袱,愛得可以好自由,好放縱.起碼你喺西方唔會被人拉去浸豬籠,唔使纏足,唔使蓮步姗姗,唔使三步不出閏房,好在可以自由愛情,唔好在可能因為太自由而有啲亂,因為自由其實係互相制衡,互相約束,唔係你想點就點,嗰啲想點就點叫做放肆.於是好多愛情故事由此產生,愛這個字我經常懷疑是由外國傳入嚟中國,中國人先至知有呢個字嘅存在!因為西方人唔會好婉轉"傳情",但係會"示愛",如一首美麗嘅poem;而中國人也會寫詩,會五言七言,會絕詩律詩,還會新詩,仲有詞,但中國詩人只說「紅藕香殘玉簟秋」([一剪梅]-李清照),唔會話"秋天來了,蓮藕謝了,我和你睡的那張竹蓆也涼了,老公你喺邊呀?",可能中國詩人太多數都有被迫害妄想症,又要學而優則仕,又要「先天下之憂而憂,後天下之樂而樂」([岳陽樓記]-范仲淹),作出嚟嘅詩話政府又要殺頭!

好喇!講咗咁耐,愛係咩嚟?可以好單一而複雜,可以好簡單而廣泛.你如果睇愛係一種感覺,咁就係單一而複雜,你可以見步行步,行出一步就自然會知下一步點行,只要堅信你愛(單一)嘅感覺,就可以去愛人,愛自己......(複雜);你如果睇愛係一條公式,一種理論,愛是簡單的,你可以說你愛的人想聽的說話,你可以買禮物氹他/她開心,你可以藉著性愛取得歡愉......這樣的時候,你愛嘅目的只有一個:就係令自己愛嘅人(包括自己)得到幸福和快樂(簡單),依照呢個目的,做的事情可多了:你愛他/她,你要付出,你會為他/她做好多好多嘢,而有啲甚至你做咗佢都唔知,知道咗可能仲會罵番你轉頭!當佢唔愛你,你又要爭取,當佢真係冇可能會愛上你,你又要忍痛學識放手,你要隨時為佢作出犧牲,而你所付出嘅,可能冇回報,但係你依然會去做(廣泛).

從此看來,愛就是你執持一個信念,去愛你所愛嘅人,為咗你所愛嘅人得到幸福和快樂而努力.這樣,就是我所知嘅愛了!