自細就有人(屋企人,身邊嘅人)灌輸一啲觀念俾我:

要讀到大學,要搵份好工,要買樓,之後三十歲左右要結婚,跟住三年抱兩,養大啲仔女,供書教學,供強積金,六十五歲儲埋一筆錢退休,咁就差唔多一世喇!

係唔係好簡單呢?

問題嚟喇!!!

當你有咁好嘅學識,又好好彩上到大學,出嚟搵工,大學生e+出到嚟都係$7000-$15000人工,但係之前嗰20年(3歲幼稚園-23歲大學畢業)所投資嘅錢好多,呢廿年投資幾多都有得計,但係你攞住張大學(學士,碩士,博士)文憑出到嚟都只係搵到$7000-$15000,會唔會覺得好唔合理呢?$15000人工己經算係高人工,可以俾阿媽話係"叻仔",之後讀多幾樣嘢,考多幾個牌,去到盡,升職加薪,俾夠$40000人工,己經係香港嘅專業人士,差唔多係咁嘅數啦!但係佪付出同埋回報都係唔啱,但係好多人都接受咗!心態係:嘩!俾我每個月$40000人工我都願啦!邊度搵呀?!

好!!!就當普遍接受咗呢個現實,呢$40000人工其實唔夠,其實大槪幾時會搵到呢$40000呢?當你30-40歲啦!嗰時你應該有啲咩呢?

一定有個就嚟結婚嘅男(女)朋友或者結咗婚嘅老公(婆),冇都唔緊要,不過阿爸阿媽會擔心啲啫!你都唔想屋企裡面多咗兩隻天鵝－日'鵝'夜'鵝',黑白天鵝:"阿女,唔通妳想做老姑婆咩?阿三姨媽個細女舊年都嫁咗!唔得!都係睇吓有邊度好人家幫妳相睇好啲!","阿仔,都咁大個人,係時候成家立室,駛唔駛幫吓你呀?"－