《南京南京》已經上映了，喱出戲一定唔可以凈系睇盜版，一定要至少去電影院睇一次。
國家、民族曾經嘅傷口，雖然已經癒合了，但每次凝視傷口嘅時候，都難免心情起伏、百感交集，彷佛見到本已癒合嘅傷口又再不斷滲血。
作為一個中國人，系有責任認識祖國嘅過去，知道祖國曾經嘅歡樂與悲痛。
尤其喺香港。喺香港嘅香港人，特別系土生土長嘅香港人，總體嚟講大多數唔懂得乜嘢系國家榮譽感、民族自豪感，乜嘢系歷史使命。國家過去系點，以後發展成點，似乎同佢地無乜關係。佢地知道邊度有靚仔靚女，乜嘢好食，乜嘢好玩，點樣生活得爽，好識得享受。人生價值、社會價值喱啲嘢，可能覺得好遙遠好飄渺甚至系虛無嘅嘢。就好似香港中文大學周保松博士講嘅，“香港沒有為社會貢獻的概念，因為社會只是抽象地指涉個體在其中追逐個人利益的場所，本身沒有任何共同目標。人們得到什麼失去什麼，一切歸於個人，和社會無涉。”（見轉載分類文章）
回歸之前，唔少香港人向來都會覺得，香港就系香港，祖國內地系國內，香港算系國外，香港系一個好地方，而國內幾乎都系亂糟糟嘅又殘又落後，唔識講國語，甚至鄙視講國語。佢地唔知道祖國嘅長江長城黃山黃河，有邊五嶽，邊五湖，邊四海，更加唔好講有幾多個民族幾多個省份果啲，甚至再誇張有未見過完整嘅中國地圖唔知中國地圖形狀似乜動物嘅，諸如此類等等。曾經幾年前，有個朋友同我講，香港喺不得已要講到內地嘅時候，都會有意無意咁將內地拍到寫到好似好窮好亂好落後咁，而對比番香港自身就似乎顯得香港好先進咁，可能佢嘅諗法比較主觀同偏激，但並非全無道理。例如就系朋友講說話咁上下果兩年，紀錄片拍到嘅廣州，畫面裏面嘅廣州老舊嘅事物居多，我地睇落去就系成個九十年代初嘅廣州咁上下。我唔想長篇大論講香港發展得好系因為點點點，而內地嘅邊個邊個城市發展有點點點嘅羈絆因素，坦白講如果論綜合實力，廣州的確比唔上香港，不過廣州都有好多香港無得比嘅地方，廣州并唔系相當多嘅香港人諗得咁落后，祖國大陸亦一樣。香港人，切忌做井底之蛙，尤其喺一個好環境嘅井裏面，就系因為井好，令到啲蛙都唔想同嘪唔識睇外面嘅世界了。部份香港人知道放眼世界，但目光卻不知注視祖國，難道中國大陸唔喺世界裏面咩?而且香港面臨嘅考驗越來越多，越來越緊逼喇。最近嘅上海PK香港嘅金融中心話題，溫家寶總理都話，金融中心嘅地位唔系確定落嚟嘅，系競爭得嚟嘅，香港猶如逆水行舟，不進則退。
不過好在喱啲情況喺香港回歸祖國之後漸漸變得改善好多喇，得益于多方面嘅努力，教育界對青少年嘅國民意識方面嘅各種教育，新移民嘅地區意識影響，同嘪國家逐漸強大嘅吸引力，香港電視都開始介紹祖國新貌喇，仲有其它。曾幾何時，張學友喺某出戲裏面扮演嘅角色都話，如果為國捐軀，要KEM國旗，唔要米字旗，要中國旗！令祖國欣慰嘅，系香港逐漸有一個向祖國靠攏嘅心態，宜家香港電視臺喺6點半嘅時候會播國歌，雖然我喺內地都睇得到，但系前排過香港玩喺姨媽度住嘅時候睇電視聽到，先覺得原來喺香港聽落會覺得國歌份外宏亮，格外激動人心。香港唔單隻名譽同物質上回歸祖國，更加要心態上精神上回歸祖國！當然，保留原本先進嘅嘢，五十年不變，以後都不變。
令人心緒萬千嘅紀念碑啊！
|
