心理學啲書講，人大咗就會越來越中意戴上面具，面具會戴上癮，越戴越多。為乜戴面具，有好多原因嘅，不過講嚟講去，無非都系果句，想其他人對自己好啲嗻，又侎討好自己。

      有啲面具系用來美化自己嘅，戴上喱啲面具都無可厚非。就好似，人中意喺別人面前表現出最好嘅自己咁啰。幾乎個個都系咁嘅啦。都有面具系醜化自己嘅，不過若果去到要戴上果啲面具嘅田地嘅時候，都算系認真夠無奈啰，唔系迫不得已嘅人睇怕都唔會戴果種面具啦。有啲人戴唔到美化自己嘅面具，就戴令自己似乎變得另類嘅面具，同美化自己嘅面具一樣，都系為咗吸引人注意。不過，你再另類，又侎系人類，除非你唔做人啰。又有啲人會戴上冷酷高傲嘅面具，其實話唔頂佢內裡系好熱心腸嘅，只不過系曾經嘅某啲事令到佢戴上果種面具嗻。當然仲有好多嘅面具啦，好難數得曬。

      當面具人嘅面具系用來改變性別嘅時候，喱種人就系俗稱嘅人妖喇。人妖除咗泰國之外，應該就算系喺互聯網最多喇。雖然，泰國果啲同互聯網果啲系有分別。不過人妖都幾有用，我講網上果啲吖，可以識朋友嘅時候唔使怕諸多麻煩，唔使驚俾人睇唔起，唔使驚俾人煩，唔使驚自己嘅私隱俾人知道無安全感，諸如此類種種。但系，俾人妖欺騙咗嘅人，就有啲無辜，至少應該講無奈啦。你帶俾我嘅信息，令到我分析過后做出來嘅行為，同我會對真正嘅你做嘅行為，唔一樣，甚至兩樣嘢相比之下會覺得尷尬滑稽，咁就真系令人起雞皮吖。欺騙感情都在其次嘞。就好似星爺拍嘅生力廣告咁，“純情小鴨鴨”、“單吊一索男”同“ 彩虹邊的雨雲”都唔可怕，可怕嘅系“如夢”變如花，喱個世界有幾多“型英帥靚正”，無人知喇。

      世上系無絕對好或者唔好嘅嘢嘅，人妖都有人中意嘅，無論泰國果啲定系網上果啲。中意嘅人或者佢都系人妖，大家系同類，會有相同情感以致能夠彼此理解；又或者系某啲有特殊心理癖好嘅人，果啲人究竟系點諗嘅，我就唔清楚啦，因為我對人妖無興趣，或者佢地帶住娛樂嘅心態咁啰，佢地可能會話，“人生如戲戲如人生啊，唔使咁認真唔使咁執著，睇人妖幾好吖，見識多啲有趣嘅事物人生先精彩嘛”；仲有啲應該系學者或者近乎學者，中意研究人妖，好似心理學家中意研究心理學咁。唔系點解咁多人中意去泰國吖，你以為真系咁多人中意去果邊浸溫泉食冬陰功吖。唔知網上果啲人妖，去到泰國見到果啲人妖，會唔會有一種親切嘅感覺咧。

      話講番轉頭，唔好歧視人妖。某啲角度某啲程度上講，我地同人妖無乜分別，大家都系有戴面具嗻，或者我地嘅心態系同人妖差唔多嘅，可能我地一唔小心，連人妖都不如，變咗妖人。不過戴面具還戴面具，千祈唔好戴得太多面具，如果戴得太多面具，人地唔知你究竟系邊個都無乜嘢，最怕就系，自己都唔知自己嘅真面目系點嘅嘞，迷失自我，咁就悲哀喇。