今日又去1號朋友度玩，順便幫襯佢買咗啲嘢。

      坐車去嘅時候，開始，車上公交視頻放緊《2009我們的演唱會》海選。見到有條友勁吖，居然唱粵曲參賽，用女聲男聲唱《帝女花》都得，後尾仲跳嘪啲搞笑嘅舞。睇佢個名，仲搞笑，夏鑫，用廣府話讀笑到我肚痛~，仲要偷偷笑唔可以大笑，費事人地以為我走犯。

      後來聽到車上有兩個小男生聲音，兩個人聽落都未夠十歲，講啲嘢亂七八糟，幾搞。開始其中一個問，有無人姓牛又喺牛年出世嘅，有個大人隨便答佢應該有。跟住佢又問，咁有無人姓牛又牛年出世又系金牛座嘅，另一個細路話有。問題小朋友繼續問，咁有無人姓牛又牛年出世又金牛座娶嘅老婆又姓牛嘎，另一個小朋友話有，同年就得。問題小朋友又問咁有無人姓牛又牛年出世又金牛座娶嘅老婆又姓牛又金牛座嘎，我暈了，唔想再聽落去了，跟住對著窗口發呆。

      發咗好耐呆，回番神嚟，又聽到兩個小朋友喺度講啲簡單嘅英語，中式英語多，多數都中文思維英文讀法拼湊嘅，不過驚奇佢地咁細個都識唔少單詞。講講下，其中一個問，唔知【廢柴】英文點講咧。另一個話，嗄有嘅咩。問嘅話，肯定有喇。兩條友沉默咗一下，另一個講，廢~柴~（提高音調當英文讀~）。問嘅哈哈大笑，跟住又話，唔系吖，應該系柴~廢~，知唔知點解？另一個話，哦系喔~，名要掉番轉嚟讀。問嘅講，系吖。— —！我又好笑又想暈……