之前又試過到不了到此處，於是我開始懷疑系網速嘅問題，或者內地網速同HK差一截嘅緣故。

今晚《畢打自己人》終於大結局了，估唔到嘅結局，或者如輿論所說，草草結局，不過仲算系一個美麗嘅結局。

但遺憾系，陳鴻烈大哥去咗。陳鴻烈即系閆器嘅演員，佢可以算系叔伯輩了，但我仲系親切地叫佢陳鴻烈大哥吧，雖然彼此唔認識。

我自從睇《畢》以來，就幾喜歡佢嘅演出。角兒本來都幾特別，一個蠱惑但又善良嘅私人企業金波集團嘅老闆。佢嘅廣府話講得唔正，所以佢會放慢速度而又有節奏咁講，帶有地方音而又抑揚頓挫嘅聲調令我覺得佢演得好有意思，聽佢講嘢就俾人一種做事好認真嘅感覺。我仲話過，講得唔正反而系佢嘅特色，好似佢咁廣府話講得唔正但又惹人喜歡嘅阿伯，實在唔多見。《畢》裡面初見佢就感覺奇妙，原來佢以前曾喺邵氏做武打小生，拍過多部電影同電視劇，難怪我話聽佢口音似曾相識。《畢》草結或者有佢離去嘅部分原因。藝人朋友粉絲們依依不捨，我都不禁感慨，HK嘅演藝界又少咗一位人才，演藝天空上又多咗一顆星星。

佢嘅離去，又令我諗起一啲人，一啲同樣已離去嘅人，同樣喺HK藝能界唔算系大牌嘅大牌。

大傻，成奎安，基本上專做反派嘅金牌配角。佢粗獷而略帶沙啞嘅聲音與傻得勻純嘅講嘢風格，同樣系佢嘅招牌，配上大塊嘅身材加上雖唔算醜陋但猥瑣嘅面部表情，實在系演惡人嘅一塊好料。記住佢嘅最深刻對白就系劉德華嘅《最佳損友》（唔知有無記錯，反正就系有損友）裡面天臺上鐵棚屋傾斜危機情景過后講嘅“原來企喺好人喱邊系咁過癮嘅喔”（可能有輕微出入），仲有《賭神》裡面嘅講“投降輸一半”時嘅表情同樣難忘。

蝦叔，關海山，出身于粵劇嘅演藝界嘅老前輩。名很有意思，曾改過，後來嘅‘關海山’倒轉頭讀就系山海關——天下第一關。無論演大人物或市井都得心應手。深沉內斂但非常到位嘅表演功力，令到我對佢嘅印象亦很深刻。劉德華嘅《五億探長雷諾傳》裡面佢演嘅老探長很老練，另外一出同樣系劉德華嘅戲忘記戲名了，佢演角色叫‘魯賓孫’，演得好入神，劉德華故意入獄救佢然後一齊搵佢女婿報仇嘅，從頭到尾仲有一個被佢地老點嘅傻仔，梁家輝演嘅~。

肥肥，沈殿霞，絕對唔系巨星，但系絕對系巨星都要尊重而敬稱‘肥姐’嘅人。肥肥除咗體重外仲有乜過人之處我實在唔了解，但人緣好嘅人靠嘅絕對唔會系運氣，‘開心果’嘅綽號系盛譽有加嘅表現。肥肥同董驃演嘅《富貴逼人》系列深入人心，仲有《外來媳婦本地郎》電影版都唔錯，我仲記得肥肥早期喺許冠杰兄弟嘅《水滸笑傳》裡面演一個厄神騙鬼嘅神婆，“捉蛇捉鬼捉蛇捉鬼”~。

仲有當然就系上文提到嘅董驃，神童驃，驃叔。一個一生與馬有關聯嘅人，改名‘驃’就系馬生長得肥大嘅意思。馬房出生，懂馬，做過馴馬師，著名賽馬主持馬評人。印象深刻嘅系除咗同肥肥聯袂主演嘅《富貴逼人》系列，仲有客串成龍《警察故事》系列，另外仲有一出周星馳主演嘅戲，《師兄撞鬼》，演一個，應該系一隻枉死嘅警察冤鬼，用法力幫助師弟周星馳破案為其報仇。仲有，喺早期80年代許冠杰兄弟嘅《摩登保鏢》裡面客串佢嘅真實人生角色——著名賽馬主持馬評人，用望遠鏡見有人墮馬，講嘅一句臺詞頗為搞笑——“系侎安東尼吖？哎，喱條友仔躂慣嘅了！”

想起來佢地嘅聲音仿佛依稀在耳旁，但人已塵歸塵土歸土。若再想起90年代與不斷成長的自己一同過來的曾經輝煌的香港電影時代，一去不復返，不禁又感慨，這真是一個風雲變幻嘅時代。

莫非正如佛家《金剛經》所云：一切有為法，如夢幻泡影，如露亦如電，應作如是觀。

嗯？我想太多了。