我又瞓唔著啦，唔通又係出街食飯累事？！唉．．．

橫掂都係典，上網典好過，不過真係好無聊，我無聊到係網上面搜尋自己個名，天下間同我同名同姓既人真係好多呀！！

原來咁睇下都好攪笑，因為通常都係ｄ班相。（哎呀！乜同我一樣咁醜樣既！）

跟住有Blog寫呢個名既人既野，佢話：今日我真係比ｘｘｘ激死呀！（唔通呢個名既人都鍾意激人既？）

又有ｄ係攞獎既名單裡面，仲有個話比ｘｘｘ扼左＄＄等等，衰野多過好咁既．．．。

講開我個名，其實細個唔鍾意呢個名唔鍾意到大個架！

細個唔知係咪漏風，講親自己個名人地都係讀番錯，要讀好多次，真係激鬼死。

仲有橫睇直睇都覺得佢好唔整齊，三尖八角咁，我橫寫直寫都寫得唔靚既，聽又唔好聽，細個番教會好興叫名，即係唔叫個姓，但係叫名果兩個字爛親切咁，叫兩個字就仲衰，硬係怪怪咁。

以前好憎人叫我個名，攪事者我好可能會唔應黎對待，但係大大下，唉！始終都跟左我廿幾年，好好醜醜都要認番佢，唔知係咪因為咁，而家我都唔係太重視人地叫我咩，反正鍾唔鍾意都係名一個者。