係燥姐同我開波到今日，我耐唔耐都會諗下到底點做好，又問下人既意見咁啦。由嬲嬲地到開始諗讀書既理論可唔可以投放落去呢，如果我係經理我應該點點點，好多理論係個腦度，好想打個醫貓比老師問下係咪應該咁咁咁，同佢討論下．．． 。

不過我既思想同行動係好有分別架！

今日燥姐一番到黎都係咁燥咁啦！佢個樣係咁架－＞．＼／．

今朝又移動下個打印機，期望可以搵個最低影響度既方法讓我生存得舒適點，於是大家都問做咩，唯一唔怕死既美菲大大聲咁同我講咁樣唔就佢喎，唔怕死既結論當然係比燥姐話啦，不過呢次唔算太過份，美菲都當聽唔到，繼續同我講笑，但係燥姐既心情雖然未到八號風球，但係都已經掛左三號。

本來我諗緊係咪應該係開始對燥姐既漠視行動之前，先同佢傾下，盤算著既時候，佢對我都係好無禮貎，佢將要比我既野拍一聲就咁放係partition上面，我唔理佢佢就再大力ｄ推過黎，我懷疑佢當左我張枱係佢個郵箱！！！

之後唔理佢去樓下搵野，番黎見到歌莉亞同卡雲傾緊計(far far away form miss angry!)，我就忍唔住叫歌莉亞調我位，但係好笑既係，我都未講我頂唔住ｄ咩既時候，卡雲已經叫我忍下，歌莉亞就接住同我申辯話燥姐掟野掟到佢都嚇親．．．佢兩個開始一人一句，我只係度"點頭"，可惜最後調位不果，搵完野番埋位既時候，見到歌莉亞係會議室好甘咁大鬧左燥姐一鑊（我就坐係會議室隔離），坐係度聽住燥姐喊晒既時候，我真係有ｄ於心不忍，但係美菲就好似好開心咁笑．．．唉！一組人好似四分五裂咁，我又開始諗，如果我係經理，應該點處理。