尋晚約左同事食飯，之後突然心血來潮，走左去左唱k。
K房不斷重覆熱播近期hit爆既"溏心"主題曲，由關姨姨唱0既"講不出聲"。呢首歌0既受歡迎程度，直頭蓋過時下新冒起既歌手，連一向位於K榜頭幾位0既Joey、Eason、千嬅等等，都唔夠呢位風韻猶存，皮膚靚到爆0既關姨姨。
雖然我都有追睇呢套戲，但我地就無點唱呢隻歌，始終...依家係去唱k，唔係睇"溏心"嘛﹗
但係，坐我地隔離房既男K迷，似乎就好鐘意呢唱歌。用佢強勁雄厚既聲線，撐大喉嚨，感情投入咁唱"講不出聲"，聽落就好似佢係爭產既其中一人。
雖然比呢位人兄既歌聲吸引到我地注意，但我地都爭取時間點唱我0地鐘意既歌。
期間，呢位K迷仲點唱左Beyond 既Rock 歌。同事話呢位人兄應該有好大壓力，需要大聲唱出黎舒緩下。都岩既，可能大聲發洩唱出黎係好既，但其實我地都唔岩，因為我地從未停止過取笑佢繞樑三尺既歌聲。
終於，係佢唱梗城城既成名曲"對你愛不完"既時候，我終於忍唔住啦﹗﹗﹗因為佢勾起左我以往對城城0既熱情呀~~~
城城係我細個時好鐘意既其中一位歌星，佢岩岩出道時既冬菇頭，同埋充盲滿動感活力既舞步，仲有最最最迷到我既，就係佢一身強壯同漲卜卜既肌肉啦﹗﹗﹗﹗﹗
一諗起我就好似發左癲咁，一口氣點左"對你愛不完"、"狂野之城"、"唱這歌"、"鐵幕誘惑"......等等快歌，MV 係佢04年開既演唱會，見到佢一時著住see through上衫，一時就半裸上身，扭動佢充滿男性線條既身體。嘩﹗殺死人啦﹗﹗﹗
發癲尖叫左一輪之後，突然好掛住我以前勁鐘意既林志穎。呢個仲唔講得笑，我真係迷到佢痴左線。記得個陣時佢岩岩出道，報紙雜誌稱佢為"過江龍"、"小旋風林志穎"。我同我好朋友都勁鐘意佢，一見到有關佢既新聞，一定會剪低篇報道。如果見到雜誌有佢既相，一定要會剪落黎，放入相簿，好好儲起。
我地仲要白痴到自拍一輯寫真相 (唔好諗邪野，所謂既寫真相，都只係擺出各種自以為最靚既post、角度影相，我地係有著衫架﹗)，最記得個陣時我著左套新既水手衫，札左條馬尾，仲要帶埋個頭cool (自以為最靚既啦﹗)。之後去左我好朋友屋企，拎住支dryers芒果味雪糕，扒係張梳化上面影相。嘩，正爆﹗好朋友，我知道輯相仲係你keep住，以免引起社會恐慌，記得千祈唔好放出去呀﹗﹗﹗
尋晚聽得唔係好夠喉，等陣搵返隻"今年夏天"回味下先~~~~
| 
2007 年 6 月 9 日 星期六 
