朋友想吃日本菜，網上見到呢間和風料理店新開，就膽粗粗同朋友黎左試喇:)

鰻魚蒲燒丼($168)

係鰻魚丼呀!一上桌，朋友已經雙眼發光！呢個鰻魚丼其他幾抵食，有三色刺身（三文魚、鯛魚、八爪魚），味噌湯，漬物同自家製甜品。特別既地方就係可以整茶漬飯。

隨餐附送既刺身雖不是厚切，但幾新鮮，沒有雪味。

漬物都係三文魚黎，同醃蘿蔔，先食前菜開始開一開胃∼

主菜有有3大條肥滑啖啖肉既鰻魚，魚肉可口甜美，份量好夠撈飯食。一丼二食，先品嚐鰻魚丼既原汁原味，食到一大半時，就可以放D黃色飯素脆脆、wasabi、湯茶，落去做茶漬飯，又係另一番風味∼

我會覺得唔夠鰻魚汁，飯粒會乾左D，倒上熱茶變茶漬飯會更好。

芝士年糕($32)

熱辣辣，超流心！

呢個店有好多小食我都想推薦，其中一款就係芝士年糕！芝士年糕新鮮炸起，好熱同好流心，食起上黎唔油膩，芝士既咸香同QQ既年糕，係絕配黎架。

燒年糕($28)

平時少食一大塊既年糕，怕濟，難得有人陪我食，所以要叫番一客先得。燒年糕令我諗番起好耐之前玩既燒年糕線上小遊戲，一個個燒好既年糕仲會向上突起呢！超可愛：Ｐ

年糕本身冇咩味，反而好重米果味，因為搽左少少醬汁，所以多一番咸味，年糕煙韌Q彈，煙韌控會好喜歡!

燒田樂飯團($20)

自從有次去日本，食過燒飯團，我就深深愛上呢！燒飯兩邊燒得焦香金黃，不易散，而醬汁更是畫龍點睛一舉，令到呢舊飯團更好食！

碎蔥吞拿魚冷奴($48)

小妹學識淺，唔知咩叫做冷奴，原來係解作豆腐~~

經google得知：

係古代時，一D手持長槍同置物箱既小兵，叫做「槍持奴」，而佢地衣服上，有一個好似豆腐既四角圖案，所以民間大眾幫豆腐起左個新名，叫「奴豆腐」。　

因為咁，涼拌豆腐就簡稱做「冷奴」，燙豆腐則叫「湯奴」或「煮奴」。

豆腐嫩滑，醬油味淡，吞拿魚蓉弄得細滑，係簡單得黎既一份美味。

燒赤蝦($22)

赤蝦外層燒得香噴噴，滴1至2滴既檸檬汁，提升佢既鮮味。蝦肉新鮮，嫩口彈牙。

唐揚魷魚鬚($32)

炸到脆卜卜又富有口感，不怕滿口炸粉漿。缺點係太熱氣，不能多吃T_T

牡蠣黃金燒($58)

店員話係是日推介，所以點左一客試試，等既時間亦都長DD。

蠔被沙律醬、蛋黃醬等覆蓋，好惹味架，不過略嫌醬汁太重味，蓋過蠔肉既鮮味。

最後，有甜品食，原來自家製甜品就係蕨餅，很清新美味。

店員好有禮貌，周不時都會過黎收碟，服務好好！

店鋪好細心，牆上有幾個衣架，冬天黎食就可以掛上厚外套

餐牌