人愈大追求既野都唔同，以前食飯只為果腹，而家係希望可以享受美食。人生已經用左咁多時係番工度，放工/放假自然就想食好D。上網做過一輪research，知道原來九龍灣都有好食既打邊爐，係甲級寫字樓內，環境清靜，所以黎左試試。呢度一別以往打邊爐的格局，平時去打邊爐既地方都係好嘈，呢度幾好，係一個高級打邊爐既地方，即使同朋友傾計都唔怕聽唔到。

侍應先放低調味盤，其中一格係XO醬，好足料，啖啖江瑤柱，要勺起一大匙呀~!

我地首先叫左一個鴛鴦鍋($118)，分別揀左沙爹湯底同香茜皮蛋湯底，湯底一濃一清。

我地都叫左好幾款餸，有桶蠔、水餃、蝦滑等等…食材都好新鮮∼

美國桶蠔($188)

 桶蠔好肥美呢！有5大隻，size都幾大，每一隻都好飽滿，碌完都唔會縮得好勁，又唔腥~放係沙爹湯底碌就惹味d，皮蛋湯底可以食到原汁原味呢。

桂花蚌($128)

 都有幾多桂花蚌，口感清脆爽口。

肉眼筋($88)

好似第一次食豬既肉眼筋。薄薄既肉眼筋，都幾多白色脂肪，口感爽嫩而肥，多一份豬油香。

鮮蝦水餃($108)

 覺得係必食呢！一共有12隻鮮蝦水餃，隻隻都好足料，唔係用蝦球或蝦粒呢。皮薄剔透，見到入面既材料，隻隻都有蝦呀、木耳，爽口彈身，鮮味足∼

蝦滑($88)

係我最愛之一，蝦滑內有好多蝦粒，上面鋪左江瑤柱呢，整體爽口彈牙，唔點豉油都好好食。

桶蠔、桂花蚌、肉眼筋、蝦滑，每樣食物都愛不擇手。

炸魚皮($68)

魚皮好脆，「索索」聲，放落湯3秒拎番上黎就最好食呢。

唐生菜($58)

打邊爐要食D菜先健康D，$58一盤菜好貴呀，不過塞到滿晒，最後竟然食唔晒……

最後仲有小小既生果送，西瓜起晒沙，好甜呀。

今餐有D貴呢，呢D豪食打邊爐，一年一兩次就夠喇><!不過勝在質素好，服務都好，打邊爐都可以好優雅，冇人打擾，仲有個經理哥哥好靚仔呢！

餐牌：

餐廳資料：江南庭敘 
地址：九龍灣啟祥道17號高銀金融國際中心1樓