係銅鑼灣周圍行下，見到有間日本餐廳新開張冇耐，佢地個二人套餐都係$398，即刻入去試試。

鋪頭係地下鋪，沿樓梯而下，樓梯旁都係貼晒日本海報，幾特別！

餐廳用上木系傢俬，每個冷氣口都吊住一支魚旗。

野食方面，單點既話有刺身、壽司、炸物、燒物、串燒、拉麵等…睇過一輪餐牌，我地都係決定叫一個二人餐，感覺划算D！

二人餐餐牌包括：

前菜

沙律： 黑松露帶子沙律 / 蟹王蟹子沙律

刺身：三文魚、油甘魚、甜蝦、帶子

一品料理：鵝肝多士 拼　燒汁露筍牛肉卷

壽司：花之戀、池魚王、左口魚邊、蔥吞拿魚卷

煮物：磯燒鮑魚海鮮鍋 / 雪花牛肉鍋

甜品

真係好豐富~~

先黎一個漬物做前菜，入面仲有D八爪魚粒、魚生粒同青瓜粒等…

沙律就揀左蟹王蟹子沙律，冇諗過份量會有咁多！

蟹子沙律有勁多，我開頭以前只係兩小碗沙律，原來係咁大份。沙律夠凍，由青瓜絲同甘筍絲整成，爽口清新，再加上D蟹子，口感又豐富D。而蟹王係原隻炸軟殼蟹，香口不油，唔錯呀∼

刺身用一個盆以冰底盛住，上面仲有隻貓頭鷹作擺設~~ 刺身有三文魚、油甘魚、甜蝦、帶子，各2-3片左右~刺身有光澤，冰感唔算太重。三文魚油潤，帶子爽甜。

一品料理有齊2款食物：鵝肝多士 同燒汁露筍牛肉卷。

鵝肝唔算好大舊，但煎得邪惡，外層微脆，而多士脆口，趁熱食就最好∼

燒汁露筍牛肉卷

 賣相精美，每條露筍都被牛肉包住，帶出隻重口感。牛肉juicy多汁，肉質鬆化，現上燒汁更惹味。朋友唔太食牛，我食呢度已經開始飽喇∼∼

壽司有花之戀、池魚王、左口魚邊、蔥吞拿魚卷，每款都係各2件，基本上都係細細件，好精緻。

尤愛左口魚邊，只因它油脂豐富，入口即溶呢~

煮物有磯燒鮑魚海鮮鍋 或 雪花牛肉鍋，我地揀左磯燒鮑魚海鮮鍋∼∼

海鮮有2大隻磯燒鮑魚、帶子、青口、蝦等…比想像中多料同豐富。磯燒鮑魚柔軟有咬口，湯底好清甜。

幸好甜品係小小既心太軟蛋糕仔，一口一過癮，我同朋友都係飽到捧住個肚走。

餐廳資料：蕎道樂居酒屋 
地址：銅鑼灣軒尼詩道499號永光商業大廈地庫