早晨啊∼

　　自從屋企再冇人睇報紙後，我都好少掂報紙了。以前成日同啊爹一齊睇社評漫畫，夜晚瞓唔着又會偷偷睇風月版……咳咳，講得太遠了抱歉orz

　　到最近自己買報紙睇，覺得副刊啲專欄寫得好好睇。內容類似日記啊隨筆之類，呢一類正係我想學寫嘅嘢啊+ +短短兩三段，內容隨心，冇格式、結構的規限，而且夠襟睇，睇完一篇又一篇。好似零食一樣不過又有些少營養，例如有篇講街上嘅樹木冇乜位生長，只有一小塊地畀佢過世，睇完又諗起啲擺喺馬路邊日日食廢氣嘅花好慘；且不會語重心長，講完生長地方小又可以引到香港小朋友成長諸多限制，咁就一篇了。(當然都有啲作家的專欄內容寫得矯情又自命清高，睇到我眼火爆)，令到我好想日日買嚟追@@不過小人家境清貧冇乜錢，一個禮拜都只係買到一份@@

　　同埋有成份報紙喺手唔同啲。之前試過上報社官網睇新聞。雖然係免費睇，不過真係睇得好辛苦，一大堆標題喺眼前等你click，都唔知睇邊篇好。就算分類好晒畀自己，我都係非常有興趣先會click入去睇，最後睇過嘅都係得兩三篇。之但係攞住份報紙又會唔知唔覺睇晒。唔知係唔係報社特登搞到個電子版咁難睇架呢= =

（拋磚引玉）最近都很少特意找歌聽，一向聽的都快厭了T T。有甚麼好歌介紹嗎(跪拜)