兩個星期前,
當進入死亡之週之際,
係考文學前1日我同wun一齊係m記溫書.

隔離坐左兩個男人(老頭).
其中1個見到我地溫緊呢個文學,
就話: 妹妹,中國文學呀?
我同wun點頭,微笑.
老頭就大數歷代中國文人史, 甚麼陶淵明李白,
詩興大發,係度"力拔山兮氣概勢"...
老頭: 我好勁架,xxx將我d文章攞去比台灣國民黨既xxx睇架!

到佢地走個時, 仲好有禮咁講: 再見妹妹!
我同wun報以最真誠既微笑.
之後, wun既眼神透露出"頂"字.

兩日後, 就要考中史.
我同wun前1晚再落去溫書, 冇錯我地重遇老頭2人幫.

上次勁有文才既老頭今次比較靜, 另1個束頭髮既老頭就...仲勁.

長頭髮(指住wun): 妹妹,我認得你副眼鏡!
wun仍是微笑不語, 低頭.
長頭髮: 考中文呀?
我: 中史.
長頭髮: 即係中文啦!
wun: 中文中史係兩科黎架.
長頭髮: 中史係咪用中文考呀? 中文包括文史哲, 我岩,你都岩.你話我岩唔岩?
我(點頭): 嗯嗯嗯嗯嗯.
長頭髮: 中史好難架,我咁叻都讀唔黎呀!我呀,係諾貝爾文學獎得主呀!都讀唔黎呀!
　　　　妹妹,唔洗咪書架,寫個大綱,大綱呀!幫你記番讀過d咩!讀課文冇用架!
　　　　我呀攞諾貝爾文學獎架,都讀唔黎呀!

有個婆婆坐係另一面.

婆婆(低聲): 戴咩眼鏡呀,戴戴戴,信唔信我除左你副眼鏡丫拿...
長頭髮: 我阿媽係慈禧太后呀! 佢好似慈禧太后咁陰毒呀!
　　　　好又係女人,衰都係女人!
婆婆(低聲): 毒毒毒,毒你個死人頭咩!係咁咪書做乜呀!呀xxx,扮睇我唔到,唔認阿婆呀?!
長頭髮(笑): 佢傻架?
婆: 戴咩眼鏡呀,女子無才便是德,你聽唔聽到呀?女子無才便是德呀!
長頭髮: 女人最緊要靚,叻唔叻冇用架!最緊要靚,仲要靚得標青!
婆: 女子無才便是德呀,仲咪書? 信唔信我除左你副眼鏡丫拿,唔認阿婆?!

如是者過左唔知幾多分鐘...

婆(上前望住我): 阿妹妹,我係咪識你架?
我: 唔識喎.
婆: 見過你幾次就好似識識地咁囉!(然後就走左去)

過左陣,阿婆番來了.

婆(上前睇wun既書): 等我睇下識唔識先...唔...
婆(向wun): 女子無才便是德呀...阿xxx,你係咪我個孫呀?
wun: 唔係呀.
婆: 我做少奶奶個時你就認我,宜家我做阿婆你就唔認我...阿xxx,你係咪xxx呀?咁似樣既?
wun: 我唔識你架.
婆(低聲): 你唔係xxx?一樣樣架喎...信唔信我除左你副眼鏡落黎丫拿...
wun低頭自顧自的.

婆過左陣就真係走了.

另一邊廂, 阿老頭問長頭髮食唔食雪糕.
老頭: 你對我好,我請你食雪糕.
長頭髮: 我對你好?我點對你好呀?唔食呀!
老頭: 你請我食飯,即係對我好,你食咩雪糕呀?
長頭髮: 唔食雪糕呀,要食你自己食,唔好買比我,到時又話我唔食...
老頭: 我宜家去買雪糕,買埋比你.
--靜左幾分鐘--
長頭髮: 唔食雪糕呀,飲汽水都得既...

呢個世界真係無奇不有.