真係出太陽，世事真係有好多野料唔到。

繼續畫，一路畫，故事會點發展，

同我接下來既人生一樣，無人知。

但主角結局已經注定，必需一死，不過係一個短篇，

何必整死主角呢係咪？

如果真係要咁問，我都實在唔識答。

有一首好歌，真心覺得好，

但為左唔好令我既年齡同各位差太遠，唔PO啦…

真係SAD。

點解我會咁鐘意舊歌嫁？

搞到自己本來已經好老餅既樣再老多兩年。

想剪短頭髮，其實，係已經決定左要剪，

要考慮既係，係澳門剪定台灣？

台灣的話，番到澳門我老媽老豆肯定會大驚訝，

但我唔知邊到剪好。

澳門的話，同樣都係唔知邊到剪好。

再者，其實要成日戴眼鏡既我，同短頭髮可能唔太襯。

呼。

但我留左咁多年長頭髮，受夠了。

要改變，正如黎台灣既目的，

正如生存既意義，

要尋求一D野，而唔試過始終唔會知。

唔試過同住，唔知有幾難，

唔試過出黎自己生活，唔知一個人洗碗幾咁寂寞，

唔試過洗衫，唔知媽咪對手瓜原來係咁樣練成，

唔試過忍耐，唔知呢段感情仲可以持續幾耐，

唔試過維持，唔知愛既定義到底係溫聲定係刺激。

唔試過喊，唔知點笑。