呢排中意咗Fiona，
所以特意搵咗呢篇報道來同大家介紹。
---------------------------------------------------
薛凱琪很得天獨厚。今年八月，便二十六歲了，仍有一種少女的嬌憨青澀。一顰一笑，依然能俘虜萬千少男少女中坑中女公公婆婆的心。她頸長肩窄，說話歪炮，我們樂意包容。她歌藝尚待進步，演技也未成氣候，我們會說：「仲後生啫！」
薛凱琪後生？不算了，但不知為何她總有辦法令我們相信她仍然很young，而且young得來很可愛那種。或許，我們就是嚮往這種成年後便消失得蕩然無存的青澀。無憂無慮的青葱歲月，誰不懷念？薛凱琪，是我們最深心處那個童話國度的投射。薛凱琪當然不會明白甚麼是青澀，在她的詞彙裏，這叫green。
「我green還green，but有green嘅味道。」薛凱琪說。電影《女人本色》剛拍完，下周出新碟《F Best》，電視劇《學警出更》又有份客串，三個媒體都有市場，green的味道，應該very good。唔知房祖名方大同，係咪都係咁諗？
Something Special
跟大家重組一下回憶。薛凱琪第一張唱片《F Debut》賣了過三萬，其他新人只拿豬肉獎，她的《奇洛李維斯回信》橫掃四大頒獎禮。紅了，負面新聞便接踵而來。先被嘲笑為「長頸鹿」，拍《學警雄心》時與吳卓羲陳鍵鋒鬧不和，被記者杯葛，演技歌藝被狠評幼嫩。隨後的，是一連串緋聞，過鏡的有鈴木仁，main cast有房祖名與方大同。她的工作量驚人，包括一個舞台劇、兩個電視劇、五部電影、六個音樂會、九張唱片、二十三個廣告，四十六個大小獎項，幾百個商場show。
大家覺得，薛凱琪應該出道多久？五年？六年？錯，才不過三年零兩個月。很多藝人混了十年八年觀眾也叫不出名字，薛凱琪甚麼都比人走快一步。可是，現實的她，卻不願長大。
忽：出道原來才三年，覺不覺得自己經歷了好多？
薛：我都好覺，計一計數，原來三年咋。可能我曝光多，頭一年已經做咗等於人哋三年嘅工作。我又惹是非，呢頭傳我同邊個不和，嗰頭又有緋聞，我公司都講，從來未做過一個artist第一年就要回應咁多。
忽：覺得自己有無轉變？
薛：無乜，雖然做過好多工作，學識好多嘢，但feel唔到自己長大過。我覺得，一個人要成熟老練，將來大把時間，難得仲可keep住一個小朋友嘅感覺，就要好好珍惜。
忽：刻意扮細路？認為咁先係薛凱琪嘅市場？
薛：我無刻意低B，只係想keep住份童心，唔想咁快變大人。一放工，我就真係放工，選擇做番個小朋友，唔會同身邊人講一句關於娛樂圈嘅事，唔會研究自己點可以再紅啲。我唔想有太多憂慮，唔希望自己變得複雜。
相由心生，喜歡薛凱琪嘅人，就係喜歡我幼嫩，夠fresh，如果我性格變了，氣質也會變，一定唔會再有依家嘅笑容。
忽：廿五歲仲強調自己小朋友，會唔會不切實際？
薛：我係活在一個童話世界裏，但有乜問題？每個人都應該有童話世界，香港人就係太現實，無晒dreams。
假如有人走嚟同我講：「薛凱琪，我好鍾意聽你啲歌。」我信o架，雖然我唔係唱得最好嗰個，但我做到歌星，一定有原因。由細到大都相信，自己有朝一日一定become something special。
|
