相信今日係呢個行程之中, 亞邊個邊個最早起身的一次。
因為我地今日參加咗一個Local Tour去山梨縣度玩.....
有d咩玩 ??? 睇落去你就知：
集合既地點响新宿西口附近, 好彩就响我地間酒店後面啫, 如果唔係就要更加早起身....
集合既時間係07:40 , 即係香港時間06:40~~ 不過我地已經响07:25已經到咗集合地點，
兼買埋早餐等上車之後先食...... 因為要坐成差不3個鐘先到第一個景點~~
我諗全團都有40幾人, 不過我無數過.... 但係香港人就連埋我地有8個....
佢地揾咗個識講普通話既職員黎同我地幾個香港人溝通.....佢講咗佢個名個中文譯音俾我聽,
不過我聽極都聽唔到係乜名, 唯有問佢個日文名la...原來佢叫做Hada San...
佢d普通話真係比普通嗰d普通話更加普通....我識聽6成, 佢識講6成,
加埋就溝通到3成6左右la.... 你話死唔死!!!!! 不過都好過無咁啦~~
 呢度就係第一個景點：化粧室是也。 幾大都落黎化番個靚粧先....
D日本人真係諗得幾周到, 天氣咁熱, 佢地就响屋上面噴d水蒸氣落黎俾人消暑...
 跟住就到咗我地第一個目的地之一：明野
 明野有d咩睇 ???? 就係睇向日葵花田la~~~`
 
靚唔靚呢 ????
 
 兩隻小蜜蜂呀...飛入花叢中呀....
 大合照~~
 跟住再坐個零鐘頭車去清裡食我地既天然食品自助午餐... 初時我重以為食齋添..... 好彩唔係, 都有肉既, 不過d蔬菜真係幾新鮮....
又有叉燒炒飯.... 亞邊個邊個都好滿意~~~
 原來呢度係俾帶寵物黎食野既, 不過要坐室外.....
由於呢度屬於高原地方, 唔俾太陽曬到既話, d風吹埋黎好清涼....好舒服....
呢隻狗唔知係乜野品種呢 ???
食完午餐之後, 就去咗一d乜野紅酒廠呀、珠寶廠呀之類既地方參觀...
之後大約4點零鐘, 就到我地今日既戲肉la !!!!!!!!
 嘩! 好多巨峰呀... 呢度係叫做勝沼既地方~~
 好大粒呀.... 
 顧住食, 唔得閒影食相呀....你地自己想像吓la .....
不過嗰兩抽我地都食唔哂, 實在太大抽la ! 貪心得滯.....
食唔哂唔可以帶走, 可以俾番佢... 有d人就買走, 不過我地無買....
老實講丫....呢d都唔算好好味...雖然平d, 但都係上次我地有4個傻人响小田急超市度等人閂門前減價, 等極都唔減嗰d好味...嗰d真係好味好多, 香好多架... 成2千1百円一小抽... 到而家都重好回味~~~
另外嗰2個傻人, 唔好恨呀... 我地無食錯架, 真係一分錢, 一分貨架~~~
 食完提子, 跟住就食桃la ....
 不過d桃就麻麻地.., 都唔係自己摘0既...
又俾d唔係咁靚既出黎俾人食..... too bad~~~
食飽飽之後, 就打度回新宿, , 原本預計7點返到去, 點知塞車, 返到去都8點幾,
食完飯成10點幾11點先返到酒店。
 至於晚餐...今次我地食咗燒物, 有牛舌, 牛肉同雞肉...
都係離唔開牛....同牛有仇???? 哈哈哈! 不過呢d好味好多..... (比起吉野家同松屋)
|
