相信大家細個都試過雙眼望住電視機，一邊睇住歌星表演，一邊模仿佢哋嘅唱功同台風。亦有好多人細細個時已經有表演慾，會參加學校嘅天才表演，又或者好似莫凱謙咁，細細個就夠膽參加電視台嘅〈殘酷一叮〉。
而原來阿Sa同阿嬌細個已經成日參加學校嘅表演活動，由驚到個心「卜卜」跳到練得大膽，所以到成年時先可以做一個對住萬人唱歌仍然揮灑自如嘅歌手！

今年Twins入行6年，特地以「相愛6年」命名佢哋嘅第2個5年嘅開始。阿Sa阿嬌合作以嚟，其實都傳過好幾次不和或拆夥，但傳聞依然無損2人相親相愛地做好拍檔。佢哋早前都提過，只要兩個一齊出現，就永遠係Twins，關係親密到好比夫婦。喺舞台上，其實Twins已經結咗婚！