【明報專訊】內地嘅愛國教育一定唔少得「學雷鋒」，新民黨主席葉劉淑儀早前返內地時，都有行吓書店，發現內地嘅書店「雷鋒熱」好勁，好多書都同雷鋒有關，佢仲特登買咗一本《人人都要學雷鋒》，送畀黨友兼副主席田北辰。
大讚拍檔有雷鋒精神
葉太向Emily大讚田二少有雷鋒精神，話佢鍾意奉獻，雖然富有，但都可放下身段，又好關心社會，了解基層，「愛奉獻、服務人民、助人為樂」。田二少就同Emily講，有一次開會時，葉太突然拎咗呢本書出嚟畀佢哋見識下，話要明白下內地人點睇，唔係叫佢真係去學雷鋒。
雷鋒精神可以話係共產黨思想教育一個重要部分，解放軍總政治部就曾經多次要求全軍以雷鋒為榜樣，牢記「忠於黨、忠於人民、忠於國家、忠於社會主義」。唔知葉太送呢本書畀田二少，係咪都想佢忠於新民黨呢？
