白姐姐喊埋一份 胡漢清媽媽記者會

【明報專訊】今期《壹週刊》報道話藝人江希文老公、資深大律師胡漢清唔畀84歲媽咪莊永楚返沙宣道大宅。雙方勞師動眾，分別搵咗立法會議員張宇人（Tommy），同埋謝偉俊（Paul）嘅紅顏知己白韻琹做傳話人，噚日齊齊喺立法會搞咗場大龍鳳記者會，港聞、政情、法庭、娛樂版成20幾個記者到場。點知莊永楚未出現，話係佢契女嘅白姐姐，一路講番契媽嘅經歷時喊埋一份，唔知嘅仲以為佢先係主角。

胡：盡力滿足媽咪要求

莊永楚話，兩母子成半年無講過電話，打畀佢就飛去留言。本來，本星期二（19日）母子約咗見面，點知見唔成，家有家歸不得，仲話乜財產都無晒。佢話，只要求個仔畀番佢上海間屋、1997年賣半山層樓嘅1150萬蚊，同埋隨時可以返沙宣道或租屋住，如果唔係，或會用法律行動追討咁講。

白姐姐話，契媽家暫住喺侄女屋企，呢排情緒波動，崩潰幾次，前晚三更半夜要去安慰佢，又話若果唔搞記招，契媽就話撼頭埋牆咁講。至於胡漢清，就因為喺法庭打官司，噚日下午託Tommy傳話，聲稱好樂意同媽咪見面，盡力滿足佢要求。

白姐姐：希望家和萬事興

白姐姐希望「家和萬事興」，仲話唔想參與家庭倫理劇，佢喺記招經常代契媽回答問題。Emily問起點解呢單嘢要喺立法會搞，Paul話呢個係「投訴個案」，不過，採訪通知係由白韻琹議員辦發出，Paul今勻真係「愛屋及烏」。