何柱國大讚 CY笑晒 解釋當年為撐唐唐「乜都要做」

【明報專訊】特首選舉嗰陣，全國政協常委、星島集團主席何柱國係唐營核心，曾經公開質疑梁振英喺咪有能力管治香港，事隔快一年，CY做咗特首，何柱國噚日出席星島集團活動時，就解釋當時因為支持另一候選人唐英年，為求令唐唐贏選舉，所以佢乜都要做。何柱國噚日仲大讚CY有能力，仲話對佢勝出特首選舉覺得開心。

CY喺特首選舉時無邀請何柱國支持，何柱國噚日就笑笑口講，呢個係CY嘅錯。何柱國話，競選並無君子之爭，係「有咁盡去咁盡」，但形容特首選舉就好似美國總統選舉咁，選完就乜都算數，選舉之後，佢亦有同CY食過飯。何柱國又話，就算唐唐當選特首，喺目前風風雨雨下嘅社會環境，佢若果要支持唐唐，都會好辛苦！

已經和解？ CY無回應

星島搞呢個傑出領袖選舉活動，除咗選舉年，以往都有請特首到場，噚日喺台上，作為嘉賓嘅CY同何柱國就有握手嘅一幕，CY仲一直展露笑容，不過佢離開時，就無回應係咪已經同何柱國和解。

任總揶揄財爺中產論

同場嘅金管局前總裁任志剛致辭嗰陣，唔點名揶揄財爺曾俊華嘅中產論，話自己身體唔好唔敢喝太多咖啡，又自認文化水平低，唔識睇法國電影，淨係愛港產片例如《低俗喜劇》，自言係「低產人士」。

15用戶喜歡這個評論表示贊賞表示不贊賞0用戶不喜歡該評論

軒轅氏  •  

“何柱國噚日仲大讚CY有能力，仲話對佢勝出特首選舉覺得開心。”
呢啲就叫做虛偽，就叫做虛情。
當日踩人踩到咁盡，已經不是競選需要，而是要致人於死地。今天，唐營垮了，中央又有指示要 “團結” ，何柱國就大讚CY了。如此雙面的人，只有兩個字可以形容︰“賤格”！

1 回覆