「輪更」迎拉布 自由黨唔制

【明報專訊】自由黨唔參與建制派為應對預算案拉布而設嘅「輪更」制，該黨榮譽主席田北俊話，自由黨唔係「超級保皇黨」，又無人喺行政會議，認為要令預算案通過係政府嘅責任，無理由要佢哋「坐會」支持政府。

建制派「輪更」留守立法會，本來係為應對社民連同人民力量就預算案拉布，避免遭突襲同流會。田少噚日同傳媒食晏時話，民建聯、經民聯、新民黨、工聯會分別有李慧琼、林健鋒、葉劉淑儀同鄭耀棠喺行會，但自由黨無議員喺行會。佢認為政府既然已經有盟友喺立法會，就無理由要自由黨負責。

田少又話流會係泛民責任，反問「唔通要將我個時間表畀埋葉國謙」？佢笑笑口話，唔介意立會通宵開會，但就唔肯承諾最少留幾多人喺立會。被問到會唔會影響同建制派政黨關係，田少話一向有同各黨派食飯，唔擔心有呢個問題。