今日小弟又繼續寫日記喇﹐尋日果篇任務完成﹐今日都要一樣﹐‘任務尚未完成﹐同志仍需努力‘﹐記得呢句說話老婆都有講過﹐古靈精怪﹐但我鐘意﹐哈哈。小弟尋晚好夜先訓﹐係度聽收音機﹐訓之前就唸起老婆果句好好笑既說話﹐’ 連我都覺得難食既野﹐邊有人會鐘意食啊‘﹐唸起時我笑左出來﹐老婆呢句肯定係笑話來啊﹐因為與事實完全不相符啊。所以小弟訓之前都忍唔住Send條信息笑下老婆﹐哈哈﹐老婆你有前途呀下。
今朝小弟又頭鐘鐘番學去﹐爭少少遲到﹐一到學校門口就打鐘喇﹐唔怕﹐小弟可以跑入去既﹐況且看門口的係我班既﹐自己人好辦事嘛。之後咪無無聊聊坐到放學囉﹐期間上去以前果班度睇下D舊同學A-Level放榜點樣﹐壞消息。我一入佢地班房﹐以前教我Amaths既Miss poon見到我就話我來探班﹐我算係啦﹐見到班野無咩心情﹐咁即是唔方好野啦﹐均哥見到我就話: 健哥﹐炒左啊。我真係愛莫能做喇。唯有就係再考過再努力過啦﹐人生最幸運的就是有機會。
我一放學就打比老婆啦﹐威啦﹐話電視大結局﹐唔同我講﹐你威曬啦﹐電視仲重要過我﹐衰人﹐惱你﹐決定惱你﹐不過都係唔惱喇﹐唔捨得惱你啊﹐哈哈。你要陪下我先得架﹐用婉轉D既方法拒絕我嘛﹐我條氣會順D架嘛﹐似熟賣熟呀嘛﹐咁又係既﹐我地咁熟﹐算啦﹐我唔惱你喇﹐老婆是對的﹐老婆永遠是對的﹐無錯﹐係我講的﹐老婆你係大曬既。老婆﹐覺唔覺得自己好威啊﹐覺就錫啖我啦﹐多謝老婆。
尋日就係寫到上面呢度無繼續寫﹐哈哈﹐小弟忙呱﹐去幫人整電腦﹐幫個細路仔整﹐七八歲啦。老婆問我佢叫咩名﹐我真係唔記得﹐因為我都無叫過佢﹐唔係﹐係叫過﹐權哥﹐不過老婆問果時我唔見得佢個名有個權字﹐直到尋晚我父親叫佢廣權我先知道番佢個大名﹐一個十分頑皮的小朋友﹐去到佢屋企﹐睇下佢話部電腦咩事原來都只係小事而已﹐小弟不廢吹灰之力就講其搞掂﹐Easy﹐之後就同佢玩下﹐佢Dad叫佢問我功課點做﹐哈哈﹐英文來的﹐唔知是二年班還是三年班的英文暑期功課﹐嘩﹐咁難既﹐你玩我咩�----呢句老婆教既﹐不過佢講得好好聽的。如果我唔識咪好於﹐唸下玩下做左兩題﹐佢都唔知我講咩﹐我問佢你知唔知呢D咩來﹐佢就話呢D咪雞腸囉﹐話咁快佢就將本野收埋﹐唔做喇。之後我咪繼續同佢玩﹐一陣佢電腦突然自動關機﹐無計﹐唔玩喇﹐哄番個老婆好過﹐驚佢又唔知點。頭先可能激惱佢﹐不過老婆話就話小氣﹐但就不知幾有容人之量﹐佢唔會惱我惱得長既。個頑皮的小孩尋晚來我屋企玩﹐一來就肯定打機啦﹐佢來到時我出左去﹐比野個駱韋均﹐比D Chem書囉。比完之後同老婆仔打比周思廣﹐問下佢A-Level考成點﹐都係衰左~~~講左幾句之後收線﹐同老婆仔再傾左陣﹐係傾到電話無電﹐不過果時都已經無咩電﹐個皇帝都係唔讓我架喇講野果時﹐仲得閑就窒下我添﹐正如老婆之前所講的﹐一個願打﹐一個願崖﹐無計﹐你情我願﹐哈哈。
小弟尋晚又睇波仔來﹐不過只睇左一場﹐係頭場德國對阿根廷﹐主場係唔同D既﹐就係贏在個主場﹐如果唔係﹐講實力就唔夠人地。尾場既意大利呢D悶波﹐真係無咩推動力去睇﹐悶悶悶的足球﹐但每隊都只係想贏﹐華麗足球好難看到﹐除非巴西肯搏曬命踢啦。哈哈﹐巴西今晚來喇﹐可惜對住的是悶波仔法國﹐希望好睇啦﹐今晚一於捧場睇波﹐哈哈。
我依家哈唔出聲啦﹐我累到老婆同佢公公一齊整既石膏公仔融曬﹐唔係一個﹐而係全部~~~今日晏晝是老婆打比我﹐話好悶﹐想出街﹐我唔比﹐原因係出面好好太陽﹐好曬﹐老婆又係度猛話要去﹐實質上老婆係唔去的﹐我知佢好聽話的﹐但佢就係鐘意口硬心軟﹐後尾佢都話唔去啦﹐我意料之內。臨收線時佢同我講話如果落雨叫佢起身﹐因為果時老婆都好累好眼訓﹐要去訓覺。我聽到佢話落雨叫佢起身﹐我只係係度笑。佢就話叫我記住﹐佢曬緊野(果時我無聽清楚佢曬緊咩﹐我以為係衫﹐我無唸過出面會落雨﹐果時好好太陽。) 。我就繼續係度笑佢﹐話出面點會落雨﹐咁好天呀。咁之後老婆去左訓覺啦~~~
好似六點幾時﹐出面真係落雨﹐但我既然唔記得左老婆叫我做既事------落雨叫佢起身。果時雨落得好大﹐但我仍是無動于衷。直到夜晚八點幾﹐我打比老婆(但我完全唔記得落雨叫佢起身果件事。) 。我打比老婆時﹐我開雪櫃﹐點知有碟野倒左出來﹐跌落我腳度﹐我只腳係油﹐地下係油﹐雪櫃底都係油﹐我未等到老婆聽電話我已經收線﹐唸住整番干淨地下。我仲未開始拖番塊地時﹐老婆就打番轉頭﹐第一句就話: 你唸住話我聽出面落雨呀。我話唔係啊。老婆就惱惱地話: 唔係添。我話唔記得左﹐仲問佢有咩事。佢就唔開心咁同我講佢同佢公公以前一齊整既公仔融左﹐佢話晏晝果時擰出去曬的。我聽到都唔開心﹐內疚起來。係我先會令佢D公仔融左﹐係我既唔認真造成的錯誤﹐是無法補救的。老婆唔開心地收線了。我一邊抹地拖地﹐一邊唸起老婆的傷心﹐我知道果D公仔是無價的﹐我徹徹底底地做錯了。
半個鐘前(九點四十六分﹐依家係十點二十一分) ﹐我打電話比老婆﹐聽到佢把聲﹐我唔知點算好。道歉我知道係無用的﹐何況老婆聽得我講對唔住實在太多太多了﹐唔道歉我又唔知講咩﹐老婆無惡地同我講野﹐但好無心機﹐老婆話我聽佢頭好痛﹐話唔同我講。我問佢沖左涼未﹐佢話沖左﹐見佢頭痛﹐又無精神﹐我咪只好叫佢早D去訓覺。收線後﹐我無咩心機﹐假如老婆好惡地鬧我﹐我可能會好過D﹐但其實都無咩分別﹐老婆都知道鬧我都無用﹐D公仔都唔會好好地。
頭先(十點二十八分) 老婆打比我﹐講野好細聲﹐我知道老婆婆好唔開心。我話仲未訓既﹐佢咪細細聲應我‘嗯’ ﹐我問佢做咩啊﹐佢唔知講咩就喊左出來﹐喊聲令我好心痛﹐我問佢做咩喊啊﹐佢喊住話頭好痛﹐我就叫老婆唔好喊﹐快抹眼淚﹐唔係一陣就發燒﹐佢就話發緊﹐好唔想聽到的說話﹐但我希望我知道﹐39.7度﹐正常體溫只係37度﹐39度已經好高了。老婆喊左一陣都無喊了﹐我問佢個頭邊度痛﹐佢話前面同側面啦﹐仲話呢度啊﹐哈哈﹐一直以來老婆好多時都話呢度呢度﹐但電話度我點知佢話呢度係邊度。但老婆的確有時係有D傻﹐今日晏晝時我仲話佢仲好似個細路咁﹐仲好細個。我問老婆覺唔覺自己仲好細個﹐佢話唔覺﹐話快二十歲﹐好驚。我知道老婆所講既驚係咩﹐但我地兩個都知就無必要講出來。同老婆傾左無幾耐﹐老婆唔舒服要收線﹐我唔開心就番屋企了。唔開心唔係老婆要收線﹐係老婆要收線既原因同我心裡的內疚﹐雖然只是一些石膏公仔﹐但我知道呢D公仔對老婆有幾重要﹐是無法替代的﹐是無假的。相對於老婆最愛既大口仔同Hello Kitty重要得多。我該做甚麼來補償呢? 但這是無可挽救的錯誤啊﹐我自己都在怪責自己﹐老婆無出聲怪我﹐對我既折扣都打起了﹐在佢心目中也越來越差。自怨自艾我知道對受傷害的一方絕對無用﹐但我真的唔知點做才好。覺得自己好似無資格了。
我QQ升左級啦﹐係一個太陽了﹐記得老婆之前升級到太陽時好開心。今朝我一醒左﹐見到老婆既信息﹐話自己醒左﹐係凌晨三點幾Send比我既﹐因為我一點幾時問老婆有無訓醒。見到老婆既信息﹐我打電話佢啦﹐果時我仲係係鋪床度﹐老婆話我QQ係一個太陽啦﹐我話我知啊﹐老婆話幫我整一整佢﹐已家我QQ既樣係老婆個靚樣啦﹐有點兒有女人味﹐哈哈。老婆幫我整之前問我QQ既號碼係咩﹐我唔記得啦﹐我只係記得我ICQ號碼﹐老婆話唔記得號碼第時會無左﹐我話我有你呀嘛﹐老婆又婉轉地亂講野啦﹐總係鐘意胡思亂想﹐我成日叫老婆唔好亂唸野﹐我知道呢D老婆都控制唔到﹐所以我只會越來越錫佢﹐付出任何我也願意﹐都很樂意地為她付出。為愛人付出是一鐘福氣﹐付出不是等候她的回報﹐只是希望為她解憂､使她快樂。我沒有其他追求你的男孩那麼好﹐但我至少將你放在第一位。我願意為你改變自己﹐這由愛你的開始已對你說過。老婆﹐請你繼續努力﹐不要放棄。

老婆﹐我愛你。

今日全日都好掛住老婆﹐因為就係掛住囉。今日無寫到果篇3000字既日記﹐聽日寫番﹐希望老婆唔好惱我啦。

老婆﹐我愛你。

今日已經六月二十九日啦﹐欠老婆既3000字日記都幾個月﹐開頭都有話我叫我寫﹐話我仲未寫等等﹐但後來都無叫我啦﹐好似放過我咁﹐其實係咪呢? 老婆就最清楚啦。而我從來都無唸過唔寫﹐有拖無欠嘛﹐我知道唔寫既後果會好嚴重﹐唔係表面上的東西﹐而我老婆內心的東西﹐係咩東西? 是好多東西﹐形象﹐信心﹐思想等等。
3000字既日記我從來都無寫過﹐無咁長﹐上次寫既都只係1500字﹐都係老婆獎賞我寫的﹐好感激她。原先只係500﹐後來就1000﹐1500﹐家下就3000﹐唔係老婆惡左既﹐係我係次次比佢罰既日記後面都懶係野咁﹐話寫咁少到喉唔到肺﹐想寫都D都唔得~~~我自己羅來衰﹐要型要面子﹐唔肯認衰仔﹐不過1500字果篇我好似無話到喉唔到肺渦﹐點解仲要寫3000字咁結啊。我知喇﹐衰靚仔﹐唔計啦﹐我都唔想既﹐我估皇帝睇到呢度都好無奈架喇﹐點解? 因為佢好少讚我﹐連我讚自己佢都經常回應一個‘超’ 字﹐成日‘超’ 我﹐搞到我都無曬符﹐無曬自信﹐(你賴得就賴啦)�--- 你應該會講啦。記得上次寫果篇1500字﹐都已經寫左四五個鐘﹐真架﹐無呃人架﹐仲係逐D逐D post上去﹐我一邊post﹐老婆就一邊睇﹐仲係度催我添﹐對我真係好。你估今次呢篇要寫幾耐呀那﹐寫到呢度﹐我已經用左大約半個鐘到﹐但呢度連500字都無渦﹐唔怕。媽媽教過我﹐只要有恆心﹐鐵柱磨成針。不過今次條鐵柱就大得可怕囉﹐支針就細到睇唔到咁囉。超﹐我都會驚既咩﹐區區3000字﹐唔通我驚呀﹐咁少﹐係咁意就搞掂啦﹐哈哈。
事到如今﹐係你逼我架咋。岩岩打電話比我﹐叫我打麻雀添﹐話我打緊機﹐你唸到你老公我咁衰﹐我話打緊日記﹐打呢篇長野﹐你既然話我唔得架喇﹐叫我算把啦﹐哼﹐唔鼓勵我之餘﹐仲踩我。有你呢句﹐係你逼我架咋﹐係要打啊﹐除非我殘廢左﹐七孔流血打唔到啦﹐如果唔係﹐我今日實將佢搞掂﹐係老婆你面前威番鋪。老老實實喇﹐有無獎勵架﹐例如錫我幾啖果D呢﹐哈哈。不過你係我既﹐錫我好應該啦﹐咁我地一言為定啦﹐我地都牙齒當金洗架嘛。你係咪想話: 你有病呀? 有病睇醫生啦。我九成估得無錯啦﹐係咪? 梗係啦。
講起你窒我﹐我真係把幾火啊(雖然比你窒慣) 。點解你同其他男仔講野溫柔過對我講野架﹐同我講野﹐兩句唔埋三句就窒我﹐又唔見你窒其他男仔渦﹐你唔通真係唔熟唔食﹐睇得起我咁呀嘛。你最好比番一個合理既理由我啊﹐如果唔係﹐你知點架啦﹐就係~~~就係~~~無事喇。哈哈﹐我點夠膽恐你呀﹐我個胸咁細(不過差唔多姐) ﹐恐你我咪仲大獲。你知你幾惡架啦﹐不過我要架﹐哈哈。我要將你乖乖地留係我身邊﹐讓我專一咁愛護你﹐我係要咁架喇﹐邊個叫你係我老婆大人渦。
寫到上面呢度﹐係時候要陪陪皇帝你了。同你玩麻雀啦﹐怕你悶親又唔開心扁嘴就唔好啦。打比你同你玩麻雀﹐擺明係送分你啦﹐你都知我實力有幾多架喇﹐接近零咁多啦﹐又真係幾多渦。一打比你﹐你就話輸左好多分﹐我睇下又唔覺渦﹐咪又係高我幾十萬﹐四十八萬﹐你有二十八萬分﹐而我得十八萬分﹐但前面有個負字﹐哈哈﹐勁呀我﹐其實大部份分數都係輸比你既﹐有一鋪八萬幾﹐係你淨係食我一個﹐偏心﹐唔公平。對電腦仲好過對我﹐叻啦你﹐惱你! 好﹐惱完﹐依家唔惱喇﹐惱你咪辛苦我自己﹐況且點可以惱個咁靚既靚女﹐惱個咁可愛既靚女﹐惱個咁好既老婆靚女呢~~~你啊﹐你夠膽擺碗藥係度四個鐘唔飲﹐仲夠膽話我聽添﹐你老公我對你真係佩服萬分﹐你當我以前講既野廢架﹐擺碗藥係度擺咁耐。你呢﹐又暗中出絕招啦﹐我話緊你時﹐你就話﹐你鬧我我喊﹐我話我都無鬧你﹐你就話我想鬧你﹐你呢招好得啦﹐一來可以免比我鬧(其實我都好少會鬧你) ﹐二來我就最怕你喊﹐我知我如果講野語氣差D﹐你都可能會喊既﹐所以我咪平心靜氣同你講囉﹐最後你都同我講條件啦﹐你係鐘意贏既﹐果時你係想聽我話去飲﹐但你又要贏我﹐咪硬要話玩一鋪麻雀先飲﹐我當然要聽你講話同你玩啦﹐哈哈﹐一鋪之後﹐你真係乖乖地去飲﹐真聽話﹐我鐘意﹐哈哈。
老婆﹐講真渦﹐好似你咁既女仔真係好少﹐又易喊又易笑﹐惱人時又易哄番﹐呢D咪就係好女仔囉﹐哈哈﹐好女仔難求啊﹐尤其係你渦。好似尋日咁啦﹐你打比我時你已經唔開心架啦﹐之後知道我係度打緊機﹐你就更加唔開心啦﹐你話我又好似以前咁﹐又買馬又買波又打機﹐你咁一講﹐我都唔知點算啦﹐你把聲又咁低渦﹐好多時你把聲越低你就越唔開心﹐成正比架嘛。講講下﹐我就係度無端端話我阿妹打咳氣打得樣衰﹐我無野講羅來講﹐之後佢話佢想架﹐老婆你都幫佢﹐之後我叫你打個來睇下﹐你話無端端點打﹐咁又係﹐我咪叫你扮打咳氣來睇下囉﹐你呢就係度笑喇﹐你唔開心時一笑就易辦事啦﹐哈哈﹐之後我地仲一齊玩我阿妹添﹐哈哈﹐你玩得好開心啦﹐你奸奸地咁囉﹐係度教我點做﹐要我妹點做﹐之後你就開心左啦。仲有啊﹐你好忍心啊﹐我話我急尿﹐你就無動于衷﹐等我無得去廁所﹐要我忍忍忍﹐幾慘啊。
尋晚幫我阿妹整好左部電腦﹐大家都可以上網﹐未整之前係度猛咁煩我﹐又話成個月既零食佢包曬﹐點知依家整好左﹐我話要包朱古力都未比到我﹐無口齒﹐唔似我咁﹐哈哈。人做Miss﹐佢做Miss﹐番來好似好累咁﹐我心唸做份咁既工又幾累啊﹐至少有得坐先啦﹐唔似得我上年暑假做果份做十二個鐘就企足十一個鐘﹐唔辛苦點得世間財呢~~~都未出過省城咁﹐做份咁既野都話累。唔辛苦點得世間財﹐睇來老婆仔唔係好同意﹐因為佢次次比賽既獎金都萬萬聲﹐真係勁啊。不過呢﹐老婆仔買既野就特別貴囉﹐應該唔係名牌唔買啦﹐果D袋既價錢就貴啦﹐五六千蚊既袋仔唔止一個兩個啦﹐一個袋既價錢就分分鐘等於某D人一個月既人工啦。不過平時就唔大洗既﹐最多咪去下冒險﹐呢幾個月都少架喇﹐瘋狂果時﹐哈哈﹐就驚人啦﹐咩今日好勁﹐幾多個藍色﹐幾多個紅色﹐幾多個黃色﹐換左幾多只公仔﹐不過都既可愛幾童真既﹐哈哈﹐呢樣我又鐘意啊﹐哈哈。
岩岩睇果套‘情陷夜中環’ ﹐果個葉旋真係賤到﹐成個變態既女人咁﹐望見佢個樣都想打獲佢﹐仲要獲甘既添﹐最憎就係望見佢個奸樣時個嘴就特別樣衰﹐真係越講越憎佢﹐呢個女人既心計就高到變曬態。總之就係望見佢前面就想打佢後面﹐不過我係斯文人來既﹐唔會動手動腳既。廢事講呢個賤人﹐曬口水。
頭先同老婆玩完麻雀﹐之後佢話去訓覺﹐點知七點幾打比佢時﹐佢就好辛苦﹐頭先嘔左好多次﹐話暈陀陀咁樣﹐聽到都心痛﹐不過皇帝每次有D咩事我都心痛﹐仲擔心佢唔知點﹐就是好怕好怕﹐怕失去﹐失去呢個全世界最好既女仔﹐無錯﹐她是完美的。
講番幾年前啦﹐皇帝果時都無玩電腦既習慣﹐第一次玩ICQ就Add左我﹐哈哈﹐緣份﹐果時就真係咩都唔識﹐十分純品﹐連粗口都唔知點解。依家就成日頂我囉﹐不過都依然唔講粗口﹐我都唔信粗口會由佢口度講出來啦﹐因為老婆一向都好清楚佢自己係度做緊咩﹐咩係對咩係錯﹐呢D從來都唔需要提佢﹐有時係口硬D既﹐不過就係口不對心囉。口不對心既唔止呢D添﹐仲又話唔采我﹐話同我絕交果D啦。老婆大人每次都係惱我一陣咁多啦﹐好大方咁采番我﹐都係我呢次呢篇日記開頭所講既﹐老婆仔好易哄番既﹐哈哈﹐果然愛我呀下﹐抵錫。
頭先打比老婆﹐佢唔舒服﹐但把聲就好好聽﹐好好聽﹐好溫柔﹐我咪叫佢早D訓囉﹐叫佢唔好好似今朝咁。事關今朝我一起身﹐都差唔多一點啦﹐我一起身打比老婆啦﹐無計﹐我太猴琴太掛住老婆了﹐我問佢做緊咩﹐佢既答案真係好好笑﹐哈哈﹐話係個大陸網度睇緊人地鬧交﹐哈哈。你地話好唔好笑啦﹐呢個皇帝做既野真係幾難想象啊﹐哈哈﹐佢頭先仲話我聽今朝睇人鬧交時﹐仲話人地無聊﹐哈哈﹐老婆你真係好意思既﹐那﹐講明先啊﹐我唔係窒你啊﹐只係講下咋﹐記住唔好惱啊﹐乖下。
講時講﹐話咁快就差唔多三千字喇﹐今次打字打得快左﹐時間都短左﹐聽日繼續啦﹐因為仲有一篇啊﹐聽日我會寫埋佢架喇﹐放心啦﹐老婆。我都係想老婆你對我有番D信心。

老婆﹐我愛你。

今日幫我阿妹整好左部電腦﹐可以上網了﹐比佢煩左幾日﹐煩到阿媽都唔認得﹐脾氣我都發左幾次。哈哈﹐今日同老婆玩我阿妹﹐我地幾開心啊﹐老婆流露左小小奸﹐呢D係我教壞既﹐我覺得係啦﹐不過我地玩得好過癮﹐哈哈。容易笑亦容易喊的老婆仔﹐我要定你喇﹐哈哈。

老婆﹐我愛你。

呢排世界杯好多時都睇波﹐所以就成日都眼訓。今晚我都要睇架喇﹐聽日又眼訓過啦。聽日我要開始喇﹐開始咩﹐老婆你估下啦﹐哈哈。

老婆﹐我愛你。