事原係個靚仔成日打機,個媽要佢收埋它,
靚仔就話:「你好煩!」
個媽話:「你唔好再打機,你一係就收埋它;
一係就繼續玩,但星期日唔可以玩NDS。」
個仔:「你咪煩啦!冤住曬!」
吵咗一輪,結果個仔都係要收埋它,
為咗星期日玩NDS。
之後個仔又話自己會儲錢買NDS,叫亞媽即管收,
個妹話:「你個戶口可能係你媽咪控制!」
個靚仔即刻冇聲出
我心諗:你亞媽經濟封鎖你,就死得啦!
錦大口氣呀啦!買NDS呀啦!

又話自己返屋企,自己喺南昌站落車,
媽話:好!我就喺麗景落,你唔好跟住我!」
ck話:「到南昌站提個靚仔落車!」
我就同冬、ck講:「我敢寫包單,
佢哋一定同一個站落車!」結果......

佢哋一走咗就開始暢所欲言
我:「我都話嫁啦!佢收埋部機就知道佢
一定同亞媽一齊落車!如果佢真係喺南昌
先落車,我就唔信個媽喺月台唔騰;
個仔喺車廂內唔知驚!」
ck:「個靚仔都無吉士」
我:「個媽都多如,同佢嘈咩啫!如果佢係我個仔,
就一早死喺我掌下!」

我心諗:生仔啦!生著哩D細哥就死得啦!
都係唔生好!!!

由香港站到迪士尼,亞冬比我同ck更心急、
更期待,但佢已經第三次去,
竟然可以比第一次去嘅人更興奮,
真係令人難明、真奇怪!!!

到咗迪士尼我哋第一件事係去醫肚,因為好肚餓
(特別係我同ck,因為都無嘜點食過野!)
之後就開始遊玩迪士尼!

第一站:明日世界~~~第一樣玩嘅係巴斯光年星際歷險∵
我同ck都覺得頗亂,因為同一個目標有無數個紅點,
你係唔會知道係咪屬於自己支槍,真係好亂!
接住係驚心動魄太空山∵
我開頭都有D驚,但上咗兩次斜但都衝落去,
我就知道同去澳門玩嘅類似!
我覺得好正!因為睇唔到條路軌更刺激!
但如果你連睇到路軌都唔敢玩,
我勸你唔洗諗可以玩到驚心動魄太空山
因為你連條軌係點都可知,錦點可以做定心理準備呢~

之後去睇夜光鬼魅巡遊,但都無咩野特別,
好彩已經係尾尾啫!

第二站:探險世累~~~只係玩森林河流之旅∵
個導遊D對白都幾令人無奈"""""
例1:哩度有種蜘蛛好特別,只係香港先有,
牠叫－東方蜘蛛(之珠)(O咀)
例2:大家睇下前面有D咩動物?
有斑馬、長頸鹿、大笨象、斑馬、長頸鹿、大笨象
同斑馬、長頸鹿、大笨象(Oh My God)
但我幾鐘意佢之後嗰句:「大家知道點分斑馬係仔定女呢?
仔係白底黑紋而女係黑底白紋,大家唔明呀!
睇下船上嘅左手邊,咪有個黑底白紋嘅女仔囉!!!」
(哈哈~)
最後嘅水火神大戰,D煙似乾冰,D火嘅熱力又正,
所以我同ck都好鐘意!

第三站:幻想世界~~~先係小熊維尼歷險之旅∵
       
我一見到Winnie the Poor 就大叫:
啊~Winnie the Poor 呀!(仲衝過去)
真係將正常忘記得一乾二淨!
(因為本人見刮Winnie the Poor 同賤兔係定失控)
入去玩小熊維尼歷險之旅嘅時候,我超high!

之後去睇迪士尼嘅主角－「星夢奇緣」煙花表演!
哇~哇~哇~
好正呀!我真係好想企喺城堡下面睇煙花呀~
好想成為公主呀~feel下都好呀~

本來去排大街詭異酒店,但太多人啦!所以先去玩
灰姑娘旋轉木馬(我又有小小失控加冬一齊,去云白馬王子)
同瘋帽子旋轉杯(我就快被佢兩個整到嘔)
結果條龍仲長,要排兩鐘呀!因為驚佢中途cut唔俾再入,
就白排同浪費時間,所以決定放棄!

最後一站:又係明日世界~~~去玩幸會史迪仔∵
都幾頂引!亞冬仲三生有幸做咗史迪仔個女朋友
(即未來史太);再去玩太空飛碟,仲講緊史迪仔;
最後係馳車天地,大家已經好累啦!

我哋出返去鵝頸街市食宵夜,返到勵德邨已經1:30am啦!
結果我哋由6:30pm玩到11:00pm,
我同ck只係用咗四個半鐘就玩曬成個樂園,
但點解亞冬要用三次嘅時間先玩得曬呢?

總結:
＊ck到最後都係無得玩鬼屋!去海洋公園可能冇飛賣;
去迪士尼又要排兩個鐘,到樂園收都未輪到佢,真可憐!
＊亞冬就無啦啦做咗史迪仔個女朋友,仲要被我哋兩個講
＊我就係最好嗰個,無咩損失!哈哈哈~