今日瞓到十二點幾先起身，好爽 ~

因為今日上水自修室冇開，

所以可以唔洗咁早起身去溫書。

其實我仲有其他地方可以去溫書既，

不過我今日都預咗自己唔溫書嫁啦。

因為約咗阿媽去睇戲 ~

事關阿媽有兩張免費既「家有囍事 2009」換票証。

不過可以換飛既戲院都唔係大型既戲院，

所以我上網 search 幾點有場個陣都 search 唔到，

要打電話去問先知。

我地去個間戲院係觀塘黎，叫銀都。

去到間戲院俾我既感覺好「up dup」。

到換飛既時候，更加覺得同平時既戲院好唔同 !

佢呢度係用人手劃飛，

我都係第一次見咋，好得意。

但同時亦唔係好相信原來而家仲有呢 d 咁舊式既戲院。

呢兩張就係用人手劃既戲飛，

阿媽話而家冇咩幾可見到嫁啦，叫我儲起佢。

入到戲院，成個場有成百幾個位，

但係睇既人我諗加埋都冇 10 個。

我同阿媽都冇跟位坐，

睇見邊個位岩就坐落去 ~

睇完晒成套戲，都冇咩印象特別深刻既地方，

淨係得啖笑，而且仲要冇以前既「家有囍事」咁好笑。

如果真係要我俾錢睇，我一定唔會睇。

之後就同阿媽係觀塘行下，

食下野就返屋企 lu。

咁岩返屋企既時候係放工時間，所以爆多人。

真係唔係幾鐘意同人逼，

雖然有時 d 人唔係有心撞埋黎，

但係被人撞到都唔係咁開心。

返到屋企我姪女話要我幫佢手砌圖，

我仲以為係一塊塊個 d 砌圖啦，

點知原來係 ..................... 一堆紙碎。

仲要有兩堆 tim !

我問佢點解佢要砌呢 d 野啦，

佢話係佢個組個組長叫佢砌嫁 wor。

我覺得佢個組長好、好、好冇聊 !

真係唔係好明而家 d 小朋友諗緊咩。

不過姪女叫到，同埋我自己又有個特殊既辟好，

鐘意做埋 d 剪剪貼貼既野，咁就冇所謂啦 ~

不過呢壇野都搞咗我成個幾鐘，整到眼都花埋 !

但係最後竟然差咗一張 @.@

大家係唔係好奇怪點解我會有得影相呢。

因為阿 B 哥哥買咗部新相機，

所以就俾咗部舊既我。

雖然 d 質素差就差咗 d ，都好過冇丫 ~

但係響早一個禮拜，

我表姐又俾咗一部相機俾我，

原本表姐係諗住俾姨媽用既，

但係姨媽唔識用，所以就俾咗我嘞。

一係就冇相機用，一係就俾兩部我，真係搞笑 !

不過我一個人都用唔晒兩部，

所以姨媽俾我個部就俾咗阿媽用，

阿 B 哥哥俾我個部我就自己用。

近排好多野打，但係打既多數係廢話，

有好多篇都只係將個日做過 d 咩打返出黎，

搞到好似記敘文咁，仲要打到好長篇 tim ~

而且連歌都有好多日都冇放過上黎。

發現呢個問題之後，

我諗我既日記之後都唔會再打埋 d 冇聊野，

我想我既日記唔再只係一個記敘文，

我仲想係一個可以好好表達我自己情感既日記，

同時又係可以帶俾大家一 d 得意野既地方。

希望之後既日記可以帶俾大家多 d 新鮮感，

同埋想大家睇我日記係瞭解緊我既思想，

多過瞭解我每日發生咗 d 咩野事 ~

fighTING is firing !!!!!!!!!!!!!!!!!!!!!!

TODAY 'S 歌詞 :

N / A