今日上完 sales & marketing 之後，
就同 ive d 同學出咗禾輋既「五十嵐」度食野，
其間講到 vikki 既屋企，原來 vikki 既阿爸係咁嚴既 ...............
向來我都唔多同人講我屋企既野，因為我自卑 !
細個讀完幼稚園之後，我就冇同屋企人住，同咗姨媽住。
原因係屋企人忙，冇時間照顧我，所以交咗我俾姨媽照顧。
雖然姨媽同表姐都好錫我，
但係細路仔都鍾意癡住爸爸媽媽嫁啦，
一年得暑假先可以同番屋企人住，
所以細個成日都好羨慕 d 同學仔可以同屋企人住，
有爸爸媽媽接放學既就重羨慕。
因為姨媽係響我間小學度做校工，
所以每日我都係同姨媽返學，
放學之後都要等埋姨媽放工先走得。
我小學係有三個門口既，一個玻璃門，係返學用既;
另外一個係鋼門，係俾老師 / 家長 / 員工 同放學用既 ;
仲有果個就淨係放學用既 。
係小學生涯六年裡面，我印象中我係得一次用玻璃門黎返學，
我記得個次仲要係旅行日，個陣我真係覺得好開心，
因為終於可以同普通學生一樣，等玻璃門開，然後再去禮堂集合。
除咗個次，我每次返學都係用鋼門，去完校工室之後先再去禮堂。
所以我小學從來都未試過遲到 ................ 因為我都唔係響正門入。
到咗三年班，我仲學人離家出走 tim ..........................
因為太掛住屋企人，所以就留咗張紙條俾姨媽，執埋包袱，
就咁就隻身由黃大仙走返去上水。
個次嚇到姨媽佢地喊 sai 咁滯，姨媽差 d 仲走上埋差館報案。
因為我既任性，搞到個個都好擔心。
自從個次之後，只要假期有一個星期以上，我都可以返屋企。
直到中三，唔知咩原因，同姨媽佢地一齊住得越黎越唔開心，
成日鬧交，所以我就提出中三之後同返屋企人住。
就係咁，我中四就同返屋企人住。
因為屋企長時間都冇人，雖然有時阿哥既女朋友會係度，
不過就算係度佢都係關埋度門，厘埋係房度，家務都唔做下。
因為以前被姨媽寵壤咗，平時都唔洗我做家務，
而家就咩都要自己做返 sai。
係屋企住耐咗先知屋企原來有好多問題，
以前放假先返去，所以咩都唔知道。
中四既時候還可以，但到咗中五問題就越黎越嚴重 !
首先屋企個熱水爐壞咗，屋企冇人肯俾錢出黎整，
十一度沖凍水涼既滋味 .............
直到十一月尾屋企先至有熱水爐用。
跟住又俾我阿哥問我借錢，借到我自己都冇錢用。
問我借錢借咗 n 次都冇還過一次，
每次問我借既時候都話最後一次，但結果 ?
屋企人又冇個係屋企食飯，我連買餸既錢都冇，想煮餐飯食都唔得。
所以中五既時候，我早、午、晚三餐都冇食，
搞到個身子好虛，d 同學仲以為我減肥 tim。
冇錢自然唔會想出街，個陣屋企又冇電腦，
得電話，所以個人沉咗，玩自閉。
之後阿爸玩失蹤，阿媽又成日返大陸，唔理我。
連屋企人都咁對我，更何況出面 d 人 ?
個陣對世界完全失望，個人變得好自卑，冇 sai 自信，冇 sai energy，
搵唔到生存既目標，書都唔想讀，應該話冇力去讀至岩，
所以成績直線下降，會考仲衰埋 tim。
返咗上水咁耐，成個中四都冇搵過姨媽，
到中五因為想去 " 哈囉喂 "，但又冇錢，
所以就諗住問姨媽借，但係見到姨媽既時候我又開唔到口。
但姨媽好似知我諗咩咁，臨走既時候俾咗 $200 我。
個陣我覺得自己好衰，點解當初成日激姨媽 ?
搞成而家咁都係自己攞黎，係我自己話要返屋企住既，
點解以前冇好好珍惜呢，到失去既時候先至識醒覺。
當時我係 lunch 走出去搵姨媽，同姨媽分開之後，
淚水已經充滿眼眶，但因為著住校服，所以都強忍住 d 淚水。
但一返到學校，我就再忍唔住，我已經特登撲係張枱度，
希望 d 人以為我係瞓覺，唔係喊，
點知都係俾人發現咗，d 同學個個都好關心我，
佢地既關懷令我好感動，搞到我喊得重犀利。
之後同阿凱去廁所，洗下個面，冷靜返個人。
阿凱，你仲記唔記得你個陣同我講咩 ?
你話如果我真係好需要用錢既話，可以問你借。
我呢一世都唔會忘記呢一番說話。
因為呢件事，我先知原來一直係我自己鑽緊牛角尖，
其實係呢個世界裡面，重有好多人願意幫我分擔痛楚。
但係我始終都係有陰影，可能因為同屋企人相處時間少，
所以我對屋企呢兩個字好陌生。
身邊好多人都好錫我，我知嫁，
但係我好驚有一日佢地突然間個個都唔要我 !
我真係好缺乏安全感既人，我知你地愛我，
我都好想為你地做返 d 野，為你地付出，不過我又怕受到傷害。
我就好似被一間好白同陜窄既房間關起咗，
為咗保護自己，選擇同人隔絕 !
所以而家個人變得好沉默，唔想同人講野。
因為自卑，所以將自己收埋，
不過咁樣係懦弱既表現，我唔應該用呢個方法，
我要面對呢一切一切，因為呢 d 全部都係唔可以改變既事實。
我知道自己而家已經有進步，
同屋企人既關係都好返 d ，不過就總係差咗 d 自信心，
雖然還未知道要點樣去克服，但為了我愛和愛我的人，我會努力的 !
我知道這世上比我慘的人還有很多，
家家有本難念的經，只是我們不知道別人的遭遇而已。
keep fighTING !!!!!!!!!!!!!!!!!!!! 
TODAY 'S 歌詞 :
我想過未來會像現在這樣嗎？
你想過未來會像現在這樣嗎？
我渴望的未來可曾是現在這樣嗎？
你渴望的未來可曾是現在這樣嗎？
這是開始？
還是終結？
是該放棄？
還是堅持不懈？
已經無所謂了？
還是徹底絕望了？
你不是說過麼——
不如就這樣走下去吧
我們不再哭泣了
是因為變得堅強了
又或者是…… ( Mirror - ayumi hamasaki ) |
真係好似咩 ?
