『呢個世界上有好多野都好難用常理去解釋，而感情就係一個好好既例子。但感情唔係一件玩具，唔係你想要就要，唔鍾意、唔想要既時候就放埋一邊，因為咁樣對人會造成好大既傷害。當你鍾意一個人，同佢係埋一齊，就應該好好咁對佢、學習點樣去同佢相處，而唔係一邊講愛佢，一邊諗住第二個或者做ｄ傷害到佢既事。當你咁做既時候，有冇嘗試將自己代入對方既角度去睇、去諗對方既感受？如果對方做同樣既野去對你，你會點？你又會有咩感覺？你又會唔會覺得難受？
或者人就係咁，所有得唔到既野永遠都覺得係最好，因為得唔到既你就會覺得係一個遺憾，你就會想做ｄ野去彌報。到你得到左喇，你會唔覺得佢係咁完美，因為你發現左佢好多唔完美既地方。即使果樣野係你當初願意放棄一切去爭取既都好，你始終有一日都會因厭倦而唔會永遠珍惜佢。呢ｄ係咪就係人性既缺點？
正如當初你同佢相愛既時候，你地都對對方好好，眼入面除左佢之外就冇第二個。但隨著時間既過去，你就發現對方有好多缺點，有好多野都達唔到共識而開始發生爭執，嘈完一次又一次，呢個時候你只會記得佢對你有幾差、有幾唔好，你對佢點好點好但佢都唔明白、唔了解、唔體諒你，所以好自然就會有分手既念頭，甚至識第二個。到有日你地真係分開左，大家都冷靜左落黎既時候，你就開始懷念你地熱戀時候既情形，佢對你點好、點就你，並漸漸忘記你地爭吵時有幾怨恨對方，之後就會後悔分手。即使而家身邊有一個對你好好既人都好，心理上你總會覺得佢唔夠好，好多野比唔上以前果個，因而去搵返你既舊愛，保持聯絡，甚至製造朋友既假象，幻想仲有機會係返埋一齊。但你又有冇諗過同緊你一齊果個人既感受？當初你為左咩原因同佢一齊？真係鍾意佢？定係為左搵一個逃避以往果段感情既地方？如果係前者，點解你仲要諗住以前果個而唔好好地咁對佢？如果係後者，你選揀同佢一齊果陣又有冇諗過而家咁做對佢造成既傷害有幾大？既然如今你地係埋左一齊，點解唔可以一齊好好咁經營呢段感情，反而去求一段已經唔再存在既感情，令歷史再一次重演？』
|
