電車男經過一大把網友幫手之後，「電車男」都變「有型男」，咁咩星座男都可以由「電車男」變成「型男」？


白羊男

呢類人就算外型幾∼難頂！幾∼騎呢！佢都係唔覺得，只要佢唔覺得有問題，佢係絕對唔會聽人講，所以要改變佢你都係死心易Ｄ囉！


金牛男

金牛座出名有品味，平日見佢一身電車男造型都只係因為冇拖拍所以不修篇幅，一旦有拖拍佢就會馬上變得好靚仔，唔駛你擔心。


雙子男

唔駛你擔心，貪新忘舊雙子座點會唔試新形象？只要你響佢身邊得閒指點下，買下時裝書過佢睇，佢自自然然會變返正常人。


巨蟹男

想改變佢個形象好簡單，只要你肯駛錢買畀佢，仲要係買過晒Ｄ新衫畀佢，佢一定會著，不過再重新一次，係要你畀∼錢∼買喎！


獅子男

一定要發動群眾力量，首先幫佢改一次形象，然後夾埋成班朋友狂讚佢，至於你可以放心，唔駛你叫佢自己都會買過晒Ｄ衫。


處女男

要改變佢形象唯一係買過晒批「名牌」衫過佢，以佢貪小便宜的性格一定會著，但係咪放鬆管住，唔係佢又會打回騎呢原形。


天秤男

放心啦！以佢的審美眼光，就算係「電車男」佢都會係最型的「電車男」，你反而要擔心佢靚晒之後畀人撬牆腳，咪畀佢咁型。


天蠍男

要改變佢要花Ｄ時間，初時佢會抗拒你介入佢的打扮，但當其他人讚佢佢就會好BUY你的建議，所以預定長期戰爭啦！


人馬男

唔好勉強佢改，人馬唔迫得，你只可以慢慢送Ｄ周邊產品等佢慢慢適應，你監佢聽你講未改變形象已經分手囉！


山羊男

你叫佢佢會改，但係如果唔係出於真心改，唔駛兩日就打回原形，唯一方法係先改變佢本人的品味，畀Ｄ耐性啦老友！


水瓶男

下？你叫外星人跟你著衫，算啦！唔好浪費時間，你同得佢一齊就要鍾意佢個內涵，外星人唔講軀殼


雙魚男

好簡單，你只要出聲就得，想佢點改佢都會聽晒你話，佢會響同你拍拖之後心裡面暗暗都想改善自己，好男人呀！