農曆新年果陣唔知係咪持續好夜先訓既原因，抵抗力又開始出現問題。

初四一起身，覺得自己唔多妥就探熱啦！點知99.8度……

個人好似即刻謝晒咁樣，晏啲再度，變番99度。

之後爸爸同媽咪出去行街，我就上MSN啦，周圍搵人傾計，又上FB玩神來也。

唔知係咪有糊食，竟然短時間退燒，麻雀既威力果然好強。

二月二日，年三十晏咒去左行年宵，不過人始終都係好多。

你根本就唔會有機會好仔細咁睇到果個攤檔擺左乜野，

你只會企起條路既中間，比後面啲人踢住黎行-V- 呢種感覺的確唔太好受。

坦白講，我有時都唔明點解要棒住杯大貢茶返屋企……

食埋野番到屋企用柚子葉沖涼之後，又係時候去康怡睇戲啦！

哈哈，23:35開場既新少林寺真係好值得期待，哇哈哈！

《新少李寺》既片長係兩個幾鐘，但係根本冇冷場，成場套都好緊湊，正！

個故事線其實真係好簡單，但可以用四個字概括──發人深省。

雖然最後幾乎所以主角都死晒，但係動作位同笑位都唔錯，值得一睇，推介。

睇完之後都已經兩點鐘啦，我地三個踱住步咁由康怡行返去西灣河間甜嫂食糖水，

唔知點解今次食呢個鮮奶燉蛋白冇上次咁好食@@　啲味好似冇咁香喔！

不過唔緊要，重點就係我好耐都未試過年三十晚咁夜仲係街道流連。

食完係條街道做一樣好重要既野，就係搵的士-V- 結果成四點鐘先訓教。

其實每年去拜年既行程都好似SET死左咁樣，初一就係北角同小西灣兩邊走-V-

夜晚就係返姑媽屋企食飯，之後就幫爸爸打左幾鋪大陸牌，

雖然頭果兩鋪唔係輸自摸就係輸降，不過最後果鋪我就自摸，攞番六十蚊！

姑媽跟住就話咁岩有八個人，不如開多檯打啦，打細啲咪得囉XD

原本都好好運，不停降，不停食；但過左十二點之後就好似死左咁樣，

開始靠自己贏番黎既七十幾蚊輸下輸下就輸左十蚊，嗚嗚嗚……

最後打到兩點鐘就走LU，又一次連續兩日三點幾先至訓-V- 爽喔。

初三夜晚就同爸爸果邊團拜，真係好多人，好開心喔！

話說我同緊個表外甥(7歲)玩果陣時，佢個妹 (1歲半)就好八卦咁走黎睇下，

跟住好出乎意料咁伸手，示意要我抱。自從果一刻開始，就基本上離唔到手。

有時放佢落地行，就要彎住條腰咁捉住佢隻手，佢左走右走，搞到條腰好酸-V-

不過唔緊要，同個咁醒同埋咁活潑既阿B玩都真係一件唔錯既事，哇哈哈！

二月九日，年初七就同成班人去左銅鑼灣間MR. STEAK食自助餐。

熱盤的確唔係好吸引；唔知點解啲青口會加辣醬，九唔答八咁，搞到我冇得食-V-

八爪魚刺身最好味，墨魚就比較硬，至於三文魚就幾新鮮，唔錯唔錯！

果度仲有好多沙律添呀，而啲甜品既款式都好特別，值得一提就係個日本CHEESE CAKE。

最具特色既就係安格斯牛扒，呢度啲扒唔似其他餐廳咁乾淨淨，好似食紙皮咁樣。

佢果啲牛當然唔夠係屋企煎果啲咁好食，但個質感的確係與眾不同。

另外再有一種特飲：芒果橙汁。入口果陣酸酸地咁，飲落左啲芒果味就出黎啦-V-超特別！

呢日返到屋企就係時候做個結算啦，睇下今年既ANNUAL INCOME狀況如何。

嘻嘻！今次都唔錯。不過實際既數目當然係TOP SECRET啦，哇哈哈。