係搞長洲宿營最辛苦既時候去廣洲渡假真係唔錯，

所有困擾度極高既煩惱暫且可以放低，輕鬆一下喇=)

更何況七月一日至三日都係住係叔公屋企，爽啊！

仲記得以前細個果陣時去完旅行搭飛機返香港果陣時，

硬係會攞幾張紙同埋一枝筆寫番晒成個旅程既趣事，

每次上親機都係舒舒服服，唔需要上接唔接下氣咁樣……

奈何今次最深刻既就係，係火車站跑黎跑去，呼~

呢三日其實都係鴨仔團咁跟住叔公架私家車周圍遊，

話說上次黎廣洲都已經係一年前既事啦，

個亞運成功舉辦之後，成個廣洲都綠化晒，

雖然成條街道好闊亦都有好多車，但啲樹既數目比車更多，

啲建築物唔再係我地心目中大陸建築既形象喇，

好多幢高樓大廈既設計比香港果啲更加靚添啊！

夜晚果陣時啲咩電視塔、酒店、國金中心同煙囪都著晒燈，

雖然耗電量好高，但係珠江河遠睇之下真係五光十色@@

話說我地見到一幢係一層一戶既住宅，每層一萬呎，嚇死人A_A

呢次基本上冇行到咩特別地方，值得講下既就係荔枝灣啦，

果道夜晚都好熱鬧，仲有條食街-V- 唔錯唔錯啊:P

除左呢道我地仲沿住珠江河咁行同埋去左番禺既蓮花山……

至於有日就去左叔公個朋友間屋道摘「黃皮」同荔枝，

先講佢朋友間屋，四層共佔三千呎-O- 我有一千呎已經好豐足-V-

天台係燒野食，三樓露台盛涼睇星星同打麻雀，二樓露台踩單車，

其餘啲套房好似仲大過我間屋咁樣，真係唔簡單X_X

話說三日內我已經食左幾十粒荔枝，身體內已存埋左幾百把火@@

仲係高溫既蒸籠下食左碗凍雙皮奶，簡直係一生一大樂事=)

第二日夜晚仲係長隆睇埋馬戲先去食宵夜──豬雜粥。

仲記得上次睇馬戲係至少七年前既事，今次睇番已經冇晒印象，

雜技真係好好睇，全場嘩然，最神奇既就係四個人係轉輪上面跳黎跳去-O-

至於啲動物出場都唔算多，最搞笑就係有幾隻熊推著架車仔，踩住單車出黎-V-

最尾結束果陣時仲有個人係遠處彈過黎，真係精彩啊，嘻嘻！

最重要既就係當中既CLOWN同觀眾好有互動，慶幸我坐得較後;)

如果唔係就會好似佢嘴對嘴咁錫落隻馬騮道，又或者彈板跳落水-V-

至於豬雜粥，其實我由小到大都唔多食內臟，今次係第一次-o-

其實坦白講放左落口咬幾咬都唔知果舊乜黎既XD.　至於啲粥就整得好香=)

至於最尾果日我地搭住架私家車衝去火車站啦，

架列車就20:15開出，而我地20:00先去到._.

由於要搵升降機，左穿右插之後終於輾轉去到過關果道，

點知海關啲人唔放我地入去，話咩已經關左……

其實果陣時我個心真係好驚，雖然隻班車走左仲有下班，

但問題係唔知有冇咁多位剩，更何況我之後果日要返學._.

擾攘左差唔多分幾鐘之後，後面又有幾個香港人黎要入去，

最後我地成班人都過左關，一衝上架列車道，就關門開車-___-

真係好好彩，我從來未試過回程係咁辛苦，

係月台道跑黎跑去，手上攞住同咩住果幾袋又唔係輕，

上左架冷氣好勁既雙程九鐵直通車之後，啲汗仲係大滴大滴咁流…

我同自己講過，以後唔可以再係咁趕頭趕命，好似走難咁><

呢次廣洲之行就係以趕搭直通車劃上句號，

宜家我比較期待就係下個星期長洲宿營，同埋月尾去山東青島@@