病有好多種，但有一種男人冇o既，女人獨家o既，但又唔係個個都有，我好唔好彩，我有呢個病，仲差唔多個個月都病，真討厭！今日我又要早退了=_=""

記得初中時，呢個病一發作， 就要勞煩班裡面最大隻o既同學孭我去醫療室，最衰讀女校， 冇機會俾d高大有型o既男仔孭tim！跟住學校就會call阿董事長黎接我返屋企，超瘀！

有時呢個病半夜三更發作仲死，係屋企"典床典蓆"，最後要 Ponchi Papa 開車車我去博愛醫院睇急症，我係個度都開o左唔少"快勞"！

出黎做o野N年啦，都俾呢個病玩謝，plan親去旅行，都要左計右計，費事撞到正，俾麻煩自己！

d醫生成日話，快d結婚啦，快d生仔啦，o甘呢個病就會好o架啦， 原來係呃人o架！結婚後你吃丸仔，生仔後你亂o左日子，梗係冇事啦！我生完Cally後享受o左一年咋，個病咪又番返黎，把鬼火！

睇黎要等到某年某月某日，機器老了， 唔work了，才可以擺脫呢個病！