哈哈!今日我又同包租公周圍 "撐枱腳" 啦!今次我地去左中環威靈頓街o既麥奀雲吞麵!

超細碗... 4粒雲吞加少少麵，下午茶都唔夠喉，不過d麵好彈牙，雲吞鮮脆皮薄，湯底以豬骨，大地魚乾，蝦米，蝦籽熬成，好味到我地連湯都飲晒! 

咁正，價錢當然有番咁上下啦，盛惠$30一碗!

食完莫講包租公，我都唔飽呀，一於繼續搵食...

經過石板街，唔行啦，食野緊要d...

eee...鏞記喎...

不如轉呔食燒鵝啦，oh... 三點半之馬，已經冇晒燒鵝lu，得番d  "跪" 係個碟度又 "屹" 起個pat pat  o既雞! 

一於下次先至黎食!

終於去到昭隆街o既永樂園餐廳...

oh... 原來要落地牢....

呢度出名食熱狗，一於一人一隻...

嘩!果然名不虛傳，隻包烤得香軟溫熱，加上荷蘭出品肉質軟滑o既香腸，醬汁用牛油，芥末，蛋黃，醃青瓜，糖鹽醋製成，唔會太酸或者太"漏"，真係好美味，唔駛3分鐘，我地就KO晒隻熱狗啦.... 咁好食... 早知俾多$2 要雙腸熱狗王啦!

再黎一杯熱奶茶，唔... 好香滑，仲好飲過檀島果杯，今日我地個肚皮真係好滿足!