為應MM的要求，寫返<番禺三大特色美食宴 - 二天為食純玩團> ，等佢睇吓我地呢個 "豬仔團" 食左d乜同睇左d乜喇!

7月23日(星期六)

明明朝早9點係深圳灣集合，都未夠鐘董事長已經急call我地，驚我地遲到唔係咁好！其實佢8點已經到左，等到唔耐煩就真！原來我地個團得16人，我地鍾氏大家庭已經佔左10人，幾乎包團！好在坐大車，可以一人坐一行，非常舒服！

經過約兩小時車程後，到左番禺，第一個行程就係食好 "正" o既午餐 -  <碗仔翅鮑魚撈雞宴>！酒家原來就係 "鍾村商貿城" 旁邊，好似返左自己鄉下咁，哈哈！

呢碗就係碗仔翅，真係有翅架@.@！

呢碟就係鮑魚撈雞喇，見唔見到d鮑魚呀?

睇唔到？放大d俾你睇，係咪好大隻呢? =_="

手快有，手慢冇呀！大姑媽仲搞笑，佢同肥仔畯坐另一枱，完全唔知有鮑魚，經我地提示後，佢話食左3隻冇人知喎！叻！

飯後去廣東科學中心睇世博廣東館，個館以＂綠色生活＂為主題，入口有我地鄉下新會o既小鳥天堂互動影像，出現百鳥歸巢美景...

門口仲有隻已經唔曉叫兼單眼醒獅迎賓，綠色生活的景觀得個綠字，好失望，館外面的上立體剪影又太多，更顯得冇野睇！

反而科學中心門外空地擺放左好多熊貓像，穿上不同國家的衣服，雖然好晒同好熱，我地都要出去影一大餐！

跟住去左大嶺村古文化村，行入村都要15分鐘，真係熱到阿媽都唔認得！原來都係睇間古廟，裡面掛左4個大牌 "show quali" 而已... 同去屏山睇鄧氏宗祠差唔多啫...唔通因為呢條村住左d 文明户所以咁出名?

好在大家都咋咋淋睇完走人，4點半就返到廣州亞運村(熱)悅水莊度假村！估唔到果度環境唔錯，房間亦很大同好舒服！

唔講都唔知，呢隻係廣州亞運推廣期間走遍海上絲綢之路o既闊闊真公主號喇！

夜晚食＜蜆魚大戰蝦蟹海鮮宴＞，好正！帥軒仲食左3碗飯tim！勁呀！

度假村當晚係亞運大舞台裡面有個2011年中國少兒模特兒大賽廣東區決賽，睇見d小朋友細細個已經變晒老人精，真係no eye see！

至於夜晚，董事長太攰一早去左搵周公，我地都係玩左一陣啤牌同紙牌麻雀就各自回房大覺瞓喇！

~~待續~~