7月24日(星期日)

經過一晚休息後，我地係度假村內食自助早餐，不過款式不多，連奶茶都冇，好在我帶左私家三合一奶茶咋！

餐後仍有個幾鐘至出發，雖然可以係村內自由行，不過天氣實在太熱喇， 我淨係沿途見到呢棵吊緊鹽水o既樹就返上房...因為我地寧願留係房內玩啤牌好過出去晒...

 終於出發了，行程第一站就係去 <四海一家> 食超豪環球自助餐，又係食！唔怪得保證食2個鐘喇，因為上晝冇景點！

去到門口已經好多人，裡面真係好大，仲分左幾個廳, 我即刻周圍睇吓有乜野食先！

食食下所長話我知行過去隔離再隔離個廳有焗蠔食，所以我地個個都山長水遠行去攞，果然有好野食，有生蠔，有鮑片，仲有扇貝同鵝肝，勁多野食！仲有真人現場自彈自唱tim！

食飽飽後出發去下一個景點，又係食！原來去李禧記免費食雙皮奶一碗，真係估唔到我地個個都食得落，勁呀！董事長仲包起我地買o既野食，正式又食又拎，哈哈！

最後一站去<南沙水鄉街>，同兩年前去有d分別，就係冇乜人黎，淨係見到好多大樹菠蘿，兼且我地啱啱至食完雙皮奶，真係食唔落又唔願行，走早走著好過！

估唔到回程時有d塞車，返到深圳灣已經黃昏了，不過今次o既行程都算過得去喇！