開學第二日，今日訓多過琴日１個鐘咁大把，不過仍然係唔夠訓。早上落住唔太大既雨，相當之清涼，都好耐無試過「擔」住把遮行返學。７點８個字左右到地鐵站，仍然係光最快到，唔通今年日日都會係佢最快．．．？期待

返到學校，帶點先驚慌，因為我所有要交既野都無拎返學，雖然我知林ｓｉｒ唔會為難我，不過少少驚在所難免。收通告果陣，乜野都唔駛做既我唯有擔下天望下地，林ｓｉｒ見我咁得閒就叫我去點下ｄ通告夠唔夠數，終於唔駛再無所事事，不過我仲未點完果陣佢走黎教書．．．Ｏｒｚ．．好彩Ｊａｎｅｔ坐我格離，幫我抄左ｄ要點。

小息之後係各社既會員大會，好早到會場既我唔知坐邊好，唯有就係行行企企咁，慢慢多人起黎，我都搵個位坐低，不過就無熟人坐我格離。坐我格離果個人好大陣汗味，即使我有少少鼻塞都仲聞得出．．．真係難頂。

放學之後同光＆正去左食碗仔翅。返屋企換衫，再食個晏，食食下接到怡ＢＢ打黎既電話，同佢吹左陣水之後佢話返到屋企再打俾我。出發去Ｌｏ仔屋企。

終於佢都打完生化４，最後Ｂｏｓｓ竟然係隻『菜鳥』，用我地既語言就係廢柴，淨係識Ｄｕｍｐ波鐘，不過個樣就好核突。Ｂｏｓｓ死左之後估唔到仲要玩快艇，Ｌｏ仔死左幾次先過到，我地３個旁觀者既結論係，玩快艇仲難過打果隻最後Ｂｏｓｓ。

返到屋企之後，做埋ｄ功課，食個飯，沖個涼之後上黎寫埋野，準備休息，聽日正式上堂，今年絕對唔要釣魚發白日夢。
－－－－－－－－－－－－－－－－－－－－－－－－－－－－－－－－－－－－－－
Ｎ／Ａ
－－－－－－－－－－－－－－－－－－－－－－－－－－－－－－－－－－－－－－
再好玩遊戲始終都會完結，無論花幾多時間上去，得到既不過係一種感覺。我地可以將現實中一Ｄ工作視為遊戲，抱住輕鬆但不馬虎既態度去做我地既工作，自然事半功倍。雖然現實某Ｄ情況下可以當做遊戲，但遊戲無論任何時間都唔係現實，將遊戲當做現實就只會為自己帶黎痛苦，現實同遊戲要共存幾乎不可能，即使可以將工作視為遊戲，但本質仍係現實．．．．．．
－－－－－－－－－－－－－－－－－－－－－－－－－－－－－－－－－－－－－－