今日係陸運會既大日子,我地等左呢日好耐,唔只係因為有得跑,而且係因為我地幾個步操......講起步操,我地四個都練左好耐,結果係點都唔再重要,因為我地有努力過,有心!!雖然今日聽人講話我地唔齊,齊係重要,但四個唔同既人,根本冇可能同時間做到完全相同既事,我好滿意我地既表現,唔理人地點講。而且今次係第一次同佢地拍檔,亦係最後一次,真係好開心.....(其實o係佢地身上學到好多,今次亦唔例外~)

之後,我去跑一百米同二百米,先講一百米啦,一百米好僥倖入到決賽,但講真...真係冇出盡全力,因為出唔到!而二百米呢,好唔掂呀...因為頭一百米仲ok,但之後隻腳完全冇力,唔知發生咩事,然後繼續跑埋落去,最後跑到第五囉,之後到左終點既時候係勁想成個灘落地下,點知想跌落地下之際,班comm就衝過黎,扶住我。(嘩,效率真係高!!!)跑完之後係勁暈,從來未試過跑完之後咁暈架,而且隻腳又軟哂,跟住o係RC個檔口度訓左一陣,醒番既時候陸運會既賽事都已經完哂。但訓完之後,都仲有少少暈同腳軟囉。唉,聽日都唔知點跑。(我被死人羅子達踩到隻腳,到而家仲痛緊~此仇不報非君子!!)

今日知道自己100米入到決賽之後呢,有勁多人走埋黎講:「連珮菁,入到決賽喎,好勁呀!」哈哈,聽到之後有D飄飄然,但聽日絕對唔可以輕敵架!!!雖然同My FD一齊跑,但事先已經講好左,會一決高下。另一方面呢,陳麗差d入到,好替佢唔抵,俾條紅社腸粉壓住。所以,聽日絕對唔只係我一個人跑,唔只得我一個為自己努力、為自己打氣,有RC班comm,最世界最信就係佢地,見佢地今日為我打氣,叫得好辛苦,聽日我係為佢地而跑,亦為自己而努力,仲有...陳麗,大家一齊加油!!!