一路以來我都覺得自己係一個唔易喊既人,就算電視劇,電影,講既題材係親情,有幾感動都好,我都唔會喊,最多個鼻會酸酸地,眼濕濕,但就唔會流出眼淚的.

今日,我終於喊左.

之前套"爸爸閉翳"其實我有追開,因為真係好好睇,入邊有我鍾意既演員,同埋劇情有喜有悲,拍得好好.

但後來唔多得閒,所以搞到臨尾既10集冇睇.呢幾日先得閒睇番.

其實呢套劇一路睇,中間有唔少既感動位,因為真係拍得好感人.劇情好生活化,但就好典型,因為往往最典型最生活化既野最容易勾起人既共鳴.當然,拍戲還拍戲,有d劇情係將現實生活理想化左的.

當睇到臨尾幾集,d劇情開始緊張緊湊,感動位越來越多,我既眼淚防線亦都失守左.尤其是臨尾果集,基本上成集都係催淚彈,我亦都響呢一集終於忍唔住喊左出黎.講到添叔中風暈左,最尾果集講到全城為昏迷既添叔慶祝生日,開心牛丸賣個滿堂紅,自己既兩個仔同兩個孫仲有一大班既親戚朋友陪自己,醒左之後,雖然已經失左憶,但就得到身邊既人關懷,庸碌一生,一心只為身邊人著想既添叔終於得到好人有好報既結果,兩個仔既然知道佢已經失左失左憶,索性幫佢洗腦,重新編過一d開心既記憶俾佢,等佢有一個開心而唔係充滿遺憾既過去,同呂家齊漠視親情,最後落得眾叛親離兼俾人告既下場形成左強烈既對比,呢個位相信帶俾觀眾一個好複雜既情緒,牽動人心就係呢種.

其實之前睇亞視既外購劇"春天後母心",呢個都係一套好感人讚頌母愛的劇集,由有"哭后"既劉雪華飾演阿媽既角色,可以話集集都有催淚彈既鏡頭,但我都只係個鼻酸酸地同眼濕濕.

今次由夏雨飾演既添叔角色,終於搞到我喊左.呢套劇入邊d演員既演技真係好好,歐陽震華同王喜,再加上夏雨呢個老戲骨,分別飾演3個茶煲daddy,仲有jacky仔(jimmy仔)同羅芷晴(貝貝)既生鬼演出,令到套劇有笑有淚,感動位自然流露.夏雨雖然係做甘草角色,但套劇既尾我覺得佢已經變左係主角,因為結局最終係圍繞住佢黎講,實在係一個老戲骨兼一個好難得既甘草演員,抵佢拎男配角獎,今次既台慶希望佢可以憑"鮑鮑"拎到!我實支持你架!

套戲真係好好睇.好值得一再回味.