今日訓到成12點幾先起身,跟住打埋尋日既日記(一篇up,一篇down,同時響尋日發生),食埋野之後,就開始做maths既報告.做左陣間,福仔打黎話今晚出去.

出到去,搵地方食野,d野超難食,又貴又唔飽,食完之後真係呻笨.除左我之外,佢地都有嗌埋野飲,不過我見好似貴得有點兒過份,所以我冇叫到.跟住到左埋單,要成426蚊,好貴囉.我原本要夾錢架,不過佢地爭住唔俾我俾,因為我前兩日生日,搞到我勁唔好意思.咁我唯有下次搵機會請番佢地啦.我心諗好彩冇嗌野飲遮,如果唔係佢地幫我俾得仲多.跟住我地係咁行,福仔就話行到好悶,不過我既心情都係冇咩分別.我直覺話俾我聽成個氣氛係由我引起.今日大髀姐帶左個新朋友仔出黎俾我地識,不過我都係成個木獨樣對住人,覺得真係唔好意思,但係我真係冇辦法,我好難迫自己扮開心,加上我本身就唔鐘意講野(所以clc oral得2分),所以搞到連我自己都唔知點.

行左好耐,終於都係要走,坐響地鐵果陣同福仔傾偈,佢一句"好似欠左佢地咁"真係令我心頭湧上黎.呢句話唔係正正講緊我咩?唔通你要我抓爛塊面留低?我尋晚係咁問自己呢個問題.我真係做唔到.呢個"欠"字,就好似一把刀咁,刺穿了我的心.

之後番到屋企,冇咩事發生,咁就一日.

P.S.1:今晚好多謝福仔同坤仔呀!下次到番我請,唔准同我爭.

P.S.2:唔使為d無謂人唔開心啦,係佢地膚淺遮.我覺得咁大個人就應該做番大個人應該做既野,唔係做埋晒d咁細路仔既野.信我,你唔使理佢地,呢件事好快就會風平浪靜.