今日係補課既最後一日,我照常8點幾起身,跟住過到德福度買左兩件蛋糕,好飽呀 !跟住冇幾耐miss就黎到,跟住幫佢拎本野落去印.搞到差唔多踏半先開始.今日教oral呀!正!今日番既人唔算多,相對地亦都冇咁嘈.今日淨係教左part a咋,不過都好好啦,知道左好多skills,因為最唔掂都係part a.臨近放學果陣,miss同我地講佢教埋今日就唔教lu.聽完之後真係有少少唔捨得架,開始就覺得佢教得麻麻,不過之後教得都ok啦,話晒相處左一段時間,可能教出左感情囉,真係唔係咁捨得 !今日係Miss Lui教我地既最後一日,即係之後番學唔會再見到佢lu.唔知又會請個咩老師番黎教呢 ?希望真係請個教到野既老師啦!講番轉頭,自從升左上中六之後,d英文一直停留響cert階段,一d都冇提升過,想死呀 !唉...點考a-level呀?呢個miss已經算係咁,教d野都算係approach exam囉,之前真係學唔到野,係咁上堂做,但係做完之後又冇進步喎,勁mung囉!禮拜3就要開始測喇,分4日測晒4個section,都唔知點死呀 !跟住miss仲俾埋"醫貓"我地,都算有心丫.同佢講完拜拜之後,都唔知幾時先至再見到佢喇.之後我就過左德福麥記等芷芷,因為今日要幫佢溫會考.溫到咁上下,佢話想去睇戲,佢打俾nancy,但係唔得閒囉,所以我就同佢去睇喇.佢原本諗住過百老匯睇既,不過我就話不如過德福ua睇下有冇上先,唔使行咁遠嘛.點知有喎,仲要咁arm線係2點2開場,所以拿拿臨買飛入場囉,學生35大元.入到去,好彩仲係廣告時間遮,即係冇蝕到 .今日我地係睇呢個精武家庭,勁正呀!阿嬌真係引死人喇,原來佢一身打女feel好鬼型呀 !又靚喎,真係開心!我地睇左差唔多兩個鐘到,我地都覺得好好睇,尤其是d打鬥場面真係好正!咁當然中間都有d搞笑位既.我地行到出去,佢一味咁讚套戲好睇.而我就試下用我愚昧既眼光分析左一下套戲:第一,佢係以家庭親子關係呢條伏線將成套戲串聯,情節緊扣,令我睇到有少少戥入邊既主角緊張,同時亦都好感動,所以我覺得呢套戲既編劇同編輯唔錯;但係另一方面,我又覺得套戲既尾爭咁d,佢唔係冇埋尾,但係我覺得咁樣既尾交代得唔清晰囉,就係咁喇.跟住芷芷就話我睇戲都咁多理論.可能我平時都有睇下d影評掛,所以開始唔係淨係齋睇咁簡單.事實上我都覺得,睇之餘,應該要識得欣賞套戲既內涵.睇完之後,我地就過番麥記食野,好肚餓呀 ,都未食晏.跟住我地行左一陣德福就過淘大,行到五點幾到就送芷芷去搭車,佢話部車唔好咁快黎,因為可以傾耐d喎,哈哈,真係細路女 .不過部車好快就到喇,咁我睇住佢上車,自己都去搭地鐵番屋企lu.番到黎,做埋個eng-class既ex,覺得好鬼累,最後伏左響張電腦枱度訓著左 .

跟住都冇咩特別野發生啦,咁就一日.

P.S.1:今日再響福仔本日記度睇到佢好似做得唔係咁開心,班客似乎有d無理取鬧囉.不過我同時亦都覺得,其實呢個真係一個好好既訓練機會囉,所以我響度支持你要過到呢關 .俾d心機呀!

P.S.2:今日係Miss Lui教我幾最後一日,雖然我真係好唔捨得你走,不過都要響度多謝你教左我咁多野.希望你日後既生活開開心心啦,有緣既,亦都希望可以再見 .最後,想借呢本日記,當住咁多朋友面前,give you a salute,請接受 !