韌力，毅力，再加上無恥。

到最後，我就會係贏家，
我要贏自己。

廿多年前贏過數以億計嘅同胞，及後有大量援助，
最終成功出世，有另一個開始。

迷失過十幾年（或者係廿年），
有教會灌輸知識道德，
嘻哈令我有自己嘅態度，
最重要有家人支持，
以及妳對我有絕情同冷酷，
滿心感謝。

呢啲都成為我奮進嘅動力，
令我無懼冷嘲熱諷。
去創造，去發掘，無牽掛地戰鬥。
好多人話我咁做會唔受歡迎，會樣衰會柒，
對我黎講，無乜所謂，反而我嫌自己唔夠樣衰，
因為通常係勁樣衰嘅男仔先可以拖個靚女。認真。

以為自己道德倒退，點知原來唔係，
係我跳出左個框而已，
達成目的以後，無邊個會記得做過幾多賤嘢，
舉個例雞會屙屎又會生蛋就咁解，
人地認為我錯嘅，我會繼續做，
唔係要證明自己啱，因為我都覺由人地嘅角度睇係錯嘅。
最尾成功左，我就贏左自己。

紋身，以現時心態睇想有，
係我需要一個非常深刻嘅故事，呢個紋身就可以有生命。
可能第時唔想要呢，唔知架。
教會弟兄姊妹通常就會撻利未記出黎。
是但啦，阻唔到我。我個紋身唔係要敬拜別神，講完。

崎呢個字，對我黎講有甚大嘅意思，
崎在，背後有支持，有靠山，所以有山，
大在於高級，熱血所以大口氣，大，亦係異於常人，
可，係喜悅，係保證，
奇就係怪異，不可測，無運嘅，少有嘅，妙。
合返一齊嘅崎字，簡單講係崎嶇，輔助詞都有得打，
就係艱辛，困難。
相信呢個崎字，唔淨止我一個配用。
基本上所有有夢想嘅人，都可以用。

丫，又會食到呢個字，同中文名通到。
Kingman, Kman幾好，
有K字嘅rapper實在太多，而且勁嗰幾個都有，
為左唔好等人嘅感覺似抄襲，所以一直都無撻朵，
事實上，我個名真係咁樣拼音。

因為迷失過，浪費過嘅時光，足夠令我以後嘅路更難。
多謝以前嘅甜酸苦辣，令我籮柚痕諗得出呢個名。

玩hip hop好多時就算唔玩文學都要玩字，合字拆字解字，
要背上呢個名，就一定要贏自己。