今日午飯後 , 收到個電話就即刻係公司飛的士去瑪加烈醫院 , 因為我細佬整親隻腳 , 搭的士過去途中 , 我好驚 , 差啲喊出黎 , 唔知係咪我心急 , 我覺得個的士司機駕車開得好慢 ;

一落車 , 我即刻衝去急症室 , 詢問處又無人 , 好在細佬個工友覺得我係揾肥成 , 主動埋黎叫我 , 跟住警察就同我簡單咁交待一下意外的經過 , 跟住我就坐係度等 ... 等 ... 等 , 其間醫生出黎問過佢係點整親 , 但佢個工友又行開左 , 咁個警察就比啲相個醫生睇 , 係個用黎FIX 住兩個貨柜既鐵架跌落黎"紮"親 , 此時 , 醫生亦向我解釋肥成既傷勢 , 醫生話都幾嚴重 , 腳瓜同腳掌嗰個"交"甩左 , 骨都斷左 , 但個人係清醒 , 我聽到都好驚 , 覺得佢好痛 ........ 隔左陣 , 肥成推出黎 , 佢見到我叫左我聲家姐 (個样好痛苦) , 仲同我講對唔住 , 隨即我啲眼淚就係咁溜 (可能肥成覺得要我地擔心 , 故同我地講對唔住) , 佢好驚 , 伸隻手叫我地捉住佢 , 陪佢 , 之後推左佢上骨科 , 醫生睇完佢 , 就話要做手術 , 個骨科醫生向我地講解一下個情況 , 先首駁返好個"交" , 我好擔心真係要鋸左隻鋸 , 故急住問個醫生會否影响將來既靈活性 , 個醫生竟然答我 : 地基都未起好 , 你就諗起三十幾層樓 , 無可能的 (頂 , 洗唔洗咁串呀 ), 我都明佢地工作量大 , 會做到躁 , 但佢都無諒解下病人家屬既心情的 , 會否用其他方法黎講會令人舒服啲呀 .... 本來我都想問個手術要做幾耐 , 但都唔敢了見佢咁既態度 , 點知我叔走去問 , 結果緊係同我一样比人串啦 pooooooor .......

肥成係推入去做手術之前 , 佢痛到眼都睜唔大 , 佢用佢隻好大既手輕撫媽咪既面 , 又捉住我隻手 , 我知佢好驚 , 我只好安慰佢 , 叫佢唔洗驚 , 勇敢啲 , 同時亦要安慰我媽 , 叫她不用太擔心 , 有得做手術即有得醫 (呢句係三少安慰我的) ; 5:00pm 開始做手術 , 我地(爸 , 媽 , 筠 , 三家姐 , 我 , 妹) 留係醫院靜候 , 終於8:00pm 推返上黎喇 , 好在肥成唔係覺得好痛 , 可能麻醉藥未過 , 個衰仔仲話要攞個電話打比佢啲兄弟話佢無事 , 頂得住 ; 我都唔敢同佢講咁多野 , 想佢趁唔痛時 , 快啲瞓下 , 怕麻醉藥散左痛到瞓唔到 ;

本來想問下醫生個手術做成點 , 可惜個醫生都無跟埋上黎 , 唯有明早等醫生巡房再問一下 , 不過有個醫護人員都好好 , 幫佢照完 X 光後 , 話我地知個"交"駁得好正 ....

7:30PM 探病時間完了 , 但我地都留到8:00PM 才走 , 希望肥成可以瞓得著啦 !

直得一讚細妹今次好幫得手 , 佢明早會到醫院等醫生黎巡房 , 問一下手術後的情況